Spa qalacaq, yoxsa ləğv olunacaq?
“Formula-1” üzrə dünya çempionatında yay fasiləsi başa çatmaqdadı. Artıq həftəsonu iştirakçılar Belçikada bir araya gələcək. Spa mərhələsi ərəfəsində komandaların düşərgəsindən fərqli açıqlamalar gəlməkdədi.
“Red Bull”un rəhbəri Kristian Hornerin fikrincə, Spa trassı “Formula-1” təqvimində qalmalıdı. Xatırladaq ki, bu trassın müqavilə müddəti ilin sonunda başa çatacaq, buna görə də gələn il təqvimdə olub-olmayacağı bilinmir. Yeni namizəd trassların sayının artması ilə əfsanəvi Spanın təqvimdəki yeri təhlükə altındadı. Hornerin bununla bağlı fikirləri:
“Spa təqvimdəki tarixi yarışlardan biridi. Montsa, Silverstoun və Spa tarixi dəyərləri olan trasslardı. Bunları qorumalıyıq. Yeni yarışların təqvimə gəlməsi əladı. Ciddi maraq var. Amma tariximizi də unutmamalıyıq. Köhnə trassların təqvimdən çıxması “Uimbldon”suz tennisə bənzəyəcək. Bu trasslar tariximizin bir hissəsidi. Sona qədər fikrimizi deyəcəyik. Lakin sonda işin başındakı adamlara güvənməliyik”.
“Maklaren”in sürücüsü Lando Norris də Spa trassı təqvimdən çıxarılacağı təqdirdə çox məyus olacaq. Növbəti mövsüm təqvimə Çin, CAR, Las-Veqas və Qətər mərhələlərinin salınması gözlənilir. Buna görə də həftəsonu son dəfə Spada yarış izləməyimiz tam realdı:
“Məyus olacam. İndiki zamanda hər şey puldu. Lakin bu bir biznesdi. Heyifdi. Spa “Formula-1” üçün tarixi trassdı. Monako ilə eyni statusdadı. Bildiyimə görə, Monako heç yarış keçirmək üçün pul da ödəmir. “Formula-1” qaldıqca o trass da təqvimdə qalmalıdı”.
“Red Bull”un pilotu Maks Ferstappen isə Spanın taleyi yox, başqa məsələ ilə bağlı danışıb. Hazırda Şarl Leklerdən 80 xal öndə olan niderlandlı çempionluğa ən böyük namizədidi. Gənc pilot üç yarışda iştirak etməsə belə, liderliyi əldən verməyəcək. Hətta bundan sonra bütün yarışlarda ikinci olsa da, yenə çempiondu. Ferstappenin fikirləri:
“Çempion olsam, bu əvvəlkinə nisbətən daha az emosional olacaq. Bu bir sürücünün ilk yarışına çıxması kimidi. Dünya çempionluğunu saymasaq, ilk yarışa çıxmağım karyeramın ən böyük qələbəsi idi. Başqalarında bu qədər emosional olmadım, çünki bolidinin həzzini yalnız ilk mərhələdə yaşayırsız”.
Sabiq “Formula-1” pilotu Devid Kulthard isə düşünür ki, “Ferrari” mövsümün ikinci yarısında qələbələr uğrunda mübarizə aparacaq. “Ferrari” mövsümün ilk yarısında, demək olar ki, bütün yarışlarda qələbə uğrunda mübarizə aparıb. Lakin “qırmızılar” ya səhv strategiyaya, ya da etibarsızlıq problemlırinə görə qələbələri əldən veriblər. Devid Kulthard:
“Məncə, “Ferrari” bu il sürətli maşın düzəldə bilib və iki güclü sürücüsü var. Şarl mövsümün ilk hissəsində sıralanma turunda rahat idi, amma Karlos yavaş-yavaş özünə gəlir. Yay tətilindən əvvəlki yarışlarda tempi yaxşı idi. “Ferrari” mövsümün ikinci yarısında “Red Bull” üçün təhdid olacaq. Çempionatdakı fərqə baxsaq, çox böyük olduğunu görərik. Mövsümün ilk yarısında “Ferrari” etibarsızlıq problemləri yaşadı və strateji səhvlər etdi. “Red Bull” mövsümün ikinci hissəsində mühərrik dəyişməyə görə cəza alacaq, amma bu cəzaları ötmələrin asan olduğu yerdə alacaqlar”.
Digər xəbərlər
