Vəli Kavlak: “Bu durumla barışmaq məcburiyyətindəyəm”
Tanınmış türkəsilli avstriyalı yarımmüdafiəçi Vəli Kavlak sürpriz qərar qəbul edib.
Football-plus.az xəbər verir ki, 33 yaşlı futbolçu karyerasını bitirdiyini açıqlayıb. 2011-18-ci illərdə “Beşiktaş”ın şərəfini qorumuş Vəli son illərdə zədədən ciddi əziyyət çəkirdi. Faktiki son 7 ildə futbolsuz qalmışdı. Çünki “Beşiktaş”dakı son 3 mövsümündə zədə üzündən cəmi 8 rəsmi oyun keçirmişdi. Ümumiyyətlə, zədəyəmeyilli oyunçu kimi tanınan Kavlak karyerası boyunca 9-u çiynindən olmaqla 15 dəfə əməliyyat olunub. Avstriya mətbuatına diqqətçəkən açıqlamalar verən tecrübəli futbolçu artıq zədələrlə mübarizə aparmağa gücünün qalmadığını etiraf edib:
“Zədələr psixoloji durumumu pozdu. Uzun müddət səbr etdim və açıqlama vermək istəmədim. Artıq futbol oynaya bilməyəcəyim reallığını qəbul etmək istəmirdim. Çiynim məni rahat buraxmadı. Çox əməliyyatlar keçirdim. Sonra geri dönməyə çalışdım. Amma gördüm ki, alınmır! 9-u çiynimdən olmaqla ümumilikdə 15 dəfə əməliyyat olunmuşam. Artıq bitdi. Futbol oynaya bilməyəcəm və bu durumla barışmaq məcburiyyətindəyəm. Sağlamlığımı qaytarmaq üçün çox pul xərclədim. Bununla özümü reklam etmək istəmirəm. Yəni futbola qayıtmaq üçün maddi və mənəvi cəhətdən əlimdən gələn hər şeyi etdim. Sona qədər savaşdım. Bəzən ağrılar gündəlik həyatda da mənə problem yaşadır. Ona görə də müalicəmi davam etdririəm. Mənim üçün xüsusi məşq planı hazırlayan almaniyalı neyro-atletik məşqçi ilə çalışıram. Bunu meydana qayıtmaq üçün yox, sadəcə, acı çəkməmək üçün edirəm. Bu baxımdan son vaxtlar bir qədər irəliləyiş hiss edirəm. B lisenziyası ala bilmək üçün Avstriya Futbol Federasiyasına bir il öncə müraciət etmişəm. Yavaş-yavaş özümü baş məşqçiliyə hazırlayıram. İnkişaf etməyə çalışıram. Bir neçə gün öncə Dortmund “Borussiya”sının baş məşqçisi Edin Terziçlə görüşdüm. O, bir ara “Beşiktaş”da köməkçi-məşqçi isləyirdi və bir-birimizi yaxşı tanıyırıq. İstanbulda yaşayıram. Həyatımın mərkəzi bu şəhərdi. İnsanlar yaşımın 33 olduğuna inanmır. Bunu bir neçə dəfə eşitmişəm. Yəni yaşım hələ də oynamağa imkan verir. Çiynimi saymasaq, yaxşı formadayam. Hər gün başımı yastığa qoymadan öncə “görəsən, zədələnməsəydim, karyeram necə keçərdi” deyitəm. “Beşiktaş”da kapitanlığa qədər yüksəlmişdim”.
Digər xəbərlər
