“Qarabağ” sabah Çempionlar Liqasının pley-off mərhələsində ilk oyuna çıxacaq.

“Viktoriya” ilə görüşün biletləri bazar günü satışa çıxarılıb. Onların qiyməti uyğun olaraq 5, 15, 30, 50, 75 və 100 manatdı. Lakin satışla bağlı məlum problemlər yarandı. Hətta “iticked.az” portalı satışı bir müddət dayandırdı.

Klubun mətbuat xidmətindən verilən məlumatlara görə, biletlərin əksəriyyəti satışa çıxarıldığı gün tükənib. Bütün bu hallar da azarkeşlərin bir növ qınağına səbəb oldu.

Lakin bu gün keçirilən mətbuat konfransında “Qarabağ”ın mətbuat katibi Gündüz Abbaszadənin verdiyi məlumat oyuna gəlmək istəyənləri sevindirdi. Belə ki, Çexiyadan “Viktoriya”nı dətsəkləmək üçün azarkeş gəlməyəcək. Ona görə də qonaqlar üçün ayrılan biletlər də satışa çıxarılıb. Onların sayı isə 2500 ədəddi.

Bu məlumatdan sonra “Tofiq Bəhramov”un kassalarına yaxınlaşıb satışla maralanmaq qərarına gəldik. Sanki azarkeşlər belə bir xəbər gözləyirdilər. 2500 biletin satışa çıxarılmasından sonra futbolsevərlər kassanın qarşısına yığışırdılar. Hər ötən dəqiqə onların sayı daha da artırdı.

Görünür, “Qarabağ”ın budəfəki oyununda da azarkeş baxımından anşlaq yaşanacaq. Bunu biletlərin satış prosesindən anlamaq heç də çətin deyil.

ŞAİR ABDULLA