Tuxel – Konte davasının təfərrüatı
Premyer-liqanın 2-ci turunun “Çelsi” – “Tottenhem” derbisində ehtiraslar coşdu: Tomas Tuxellə Antonio Konte qoldan sonra elə yan xəttin yanında münasibətləri aydınlaşdırmağa başladılar, final fiti səslənən kimi də davam etdirdilər.
Əslində oyunun ssenarisi buna yol açırdı – “Çelsi” iki dəfə irəli çıxdı, “Tottenhem” isə yalnız 6-cı uzatma dəqiqəsində xilas oldu.
Tuxel Kontenin qol sevincinə və hakim qərarına görə dəliyə döndü
Oyun sakit tərzdə başladı, künc zərbəsindən sonra “Çelsi”nin iki debütantı – “Brayton”dan gələn Kukurelya ilə “Napoli”dən gələn Kulibali qol təşkil etdi. 2-ci hissədə ehtiraslar gərginləşdi, xüsusən də Heybyerq hesabı bərabərləşdirəndən sonra – Konte yerindən çıxdı, qolu qeyd etmək üçün coşdu, “Stemford Bric”də ehtiyat oyunçular skamyasının önü o qədər də geniş deyil, italiyalı düz Tuxelin çənəsinin altında dayandı və “Çelsi”nin çalışdırıcısı dözmədi. Alman əvvəlcə Konteni “başqa yerdə bayram etməyə” göndərdi. Sonra onlar təhlükəli dərəcədə bir-birinə yaxın dayandılar. Və belə görünür, artıq Konte sevinclə həmkarının üstünə şığıdı. Vəziyyəti qaydasına salmaq üçün 4-cü hakimin əməyi yetmədi, hər iki tərəfdən yardımçılar işə qarışdı. Nəticədə Konte və Tuxel sarı vərəqə ilə cəzalandırıldı.
Çox güman, “Çelsi”nin çalışdırıcısını təkcə Kontenin davranışı yox, hakimin qərarı da qıcıqlandırmışdı. Entoni Teylor Rodriqo Bentankurun Kay Havertsə qarşı kobudluğunu gözardı etdi və təxminən 1 dəqiqə sonra Heybyerq fərqləndi.
Belə düşünmək olardı ki, bununla da iki məşqçi arasında münaqişə bitdi. Heybyerqin qolundan 10 dəqiqə sonra “Çelsi” yenidən irəli çıxdı. Tuxel bu qolu komanda ilə birgə qeyd etdi. Hətta acıq verirmiş kimi “Tottenhem”in ehtiyat oyunçular skamyasının önündən qaçdı. Hər şey “Çelsi”nin qələbəsinə diğru apararkən Keynin qol duyumu işə düşdü – 96-cı dəqiqədə hesab 2:2 oldu!
Bu dəfə münaqişə əlsıxmadan başladı
Keynin qolu ilə bağlı da suallar var: hakimlər “Tottenhem”in müdafiəçisi Romeronun Kukurelyanın saçından dartdığımı görmədi. Odu ki, Tuxelin final fitindən sonra dəliyə dönməsi təəccüblü deyil. Sadəcə, əlsıxma yeni toqquşmaya yol açdı. Həmkarının əlini yüngülcə sıxıb paltardəyişmə otağına yollanmaq istəyən Konte müqavimətlə üzləşdi. Tuxel onun əlini qətiyyən buraxmaq istəmirdi. Konte bir neçə dəfə təkrarladı: “Sən nə istəyirsən?” Yenə bir-birinin üzərinə qışqırdılar.
Bu dəfə də məşqçiləri ayırmalı oldular. Hakim isə hər ikisinə “qırmızı” göstərdi. İndi də davakar baş məşqçilərin açıqlamalarıyla tanış olaq. Əvvəlcə Tuxel danışıb:
“Düşünürdüm ki, adamlar əl sıxarkən bir-birinin üzünə baxır. O fərqli düşünür. Mən bunu bir qədər dalaşan, ancaq aralarında ciddi heç nə baş verməyən, heç biri zədələnməyən iki oyununun toqquşması ilə müqayisə edərdim. Bura premyer-liqadı, hər bir məşqçi komandası üçün döyüşür. Olan budu, qorxulu heç nə yoxdu, bu gün yaşananlar oyunun bir hissəsi idi”.
Konte də həmkarından fərqli nəsə demədi:
“Bu o qədər də vacib deyil. Əsas futboldu. Hakim mənə qırmızı vərəqə göstərdi, ancaq o başverənlərin dinamikasını anlamadı. Problem varsa da, mənlə Tuxel arasında qalacaqdı. Düzünə qalsa, mən bu hadisəyə qayıtmaq istəmirəm, ancaq nəyin baş verdiyini anlamaq üçün TV və video var. Əlbəttə, mən passiv deyildim. Aqressivlik görürəmsə, aqressivliklə də cavab verirəm”.
Digər xəbərlər
