Əsası 1911-ci ildə qoyulan “Viktoriya” Plzen şəhərini təmsil edir və tarixi ərzində 6 dəfə Çexiya çempionu olmaqla yanaşı, iki dəfə ölkə kubokunu, bir dəfə isə superkuboku başı üzərinə qaldırıb.

Ev oyunlarını 11700 azarkeş tutumuna malik “Dusan Arena”da keçirir. Klubun prezidenti Adolf Şadek, baş məşqçisi Mixal Bilekdi. Hazırda UEFA reytinqində 69-cu pillədə qərarlaşıb. Kollektivin orta yaş həddi 27,1-ə bərabərdi. Komandada fərqli ölkələrin yığmalarının şərəfini qoruyan 10 futbolçu çıxış edir. Məşhur “transfermarkt.com” saytı Çexiya klubunun bazar dəyərinin 24,55 milyon avro olduğunu göstərir.
Komandanın ən bahalı futbolçusu qapıçı Yindrjix Stanekdi. 26 yaşlı “çərçivə qoruyucusu”nun transfer dəyəri 3 milyon avrodu. İkinci pillədə iki oyunçu qərarlaşıb. Yarımmüdafiəçi Lukaş Kalvaxla stopper mövqeyində çıxış edən Pavel Buxanı transfer etmək istəyən klub isə 2 milyon 500 min avrosundan keçməlidi. Hər iki futbolçu Çexiya yığmasına da cəlb olunur.

111 yaşlı klubun intibah dövrü əsasən yeni tarixlə bağlıdı. Plzen təmsilçisi ilk dəfə 2011-ci ildə qızıl medala sahib çıxıb və elə həmin avrokubok mövsümündə də bir çoxlarını təəccübləndirərək Çempionlar Liqasının qrupuna yüksəlib. “Milan”, “Barselona” və BATE-nin yer aldığı qrupda 3-cü olmaqla mübarizəni Avropa Liqasında davam etdirib. Burda isə “Şalke-04”ə uduzmaqla turnirdən kənarda qalıb. 2012/13 mövsümündə ikinci dəfə mötəbər turnirin qrupunda çıxış etmək hüququ qazanıb. Bu dəfə “qırmızı-göylər”in rəqibləri “Mançester Siti”, “Bavariya” və Moskva ÇSKA-sı olub. Yenə qrup üçüncüsü kimi Avropa Liqasına yollanan çexlər sürpriz şəkildə Donetsk “Şaxtyor”unu məğlub edərək 1/8 finalda “Lion”a uduzmaqla mübarizəni dayandırıb.

57 yaşlı Mixal Bilek üçün postsovet məkanı heç də yad deyil. 2021-ci ildən “qırmızı-göylər”in “sükanı arxasına” keçən mütəxəssis “Astana” və Qazaxıstan yığmasında da iş təcrübəsinə malikdi. Çexiyalının CV-də “Anji” və Tiflis “Dinamosu”nun da adı var. Bilekin çalışdırdığı komandalar daha çox 4-2-3-1 taktiki düzülüşü ilə meydana çıxır. Ancaq avqustun 13-də Çexiya çempionatının 3-cü turu çərçivəsində baş tutan Kralove “Hradec”i ilə görüşdə Bilekin komandası 3-5-2 sxemindən yararlanıb və səfərdə oynamasına baxmayaraq, 2:1 hesabı ilə qalib gəlib. Cari mövsümdə Çexiya çempionatında 3 oyun keçirən “Viktorka” ləqəbli komanda hazırda 7 xalla 3-cü pillədə qərarlaşıb. Komandanın əsas qol ümidi Jan Klimentdi. 28 yaşlı mərkəz hücumçusunun hesabında artıq 2 qol var. “Qırmızı-göylər”in bu yay reallaşdırıdığı ən diqqət çəkən transferi Yan Sikoradı. Poznan “Lex”indən transfer olunan sol cinah vingeri artıq bu yay Çempionlar Liqasının seçmə mərhələsində 2 qol və 1 məhsuldar ötürmə ilə yadda qalıb.
Sonda onu da qeyd edək ki, Çempionlar Liqasının 2-ci təsnifat mərhələsindən mübarizəyə qoşulan Çexiya klubu Finlandiya HJK-sını, 3-cü mərhələdə isə Moldova “Şerif”ini mübarizədən kənarlaşdırıb.

RƏŞAD