Nadal Kanadadakı turniri buraxacaq
İspaniyalı tennisçi Rafael Nadal “tvitter” hesabında Kanadadakı “Masters” seriyalı turniri zədənin fəsadları üzündən buraxacağını yazıb:
“Dörd gün əvvəl topa zərbə üzərində işləməyə başladım və məşqdən dərhal sonra bu gün də qalan yüngül narahatlıq hiss etdim. Biz Monreala uçmamağa və hadisələri qabaqlamadan məşqləri davam etdirməyə qərar verdik. Bir daha Monrealda – çox sevdiyim və artıq 5 dəfə qazandığım turnirdə oynayacağıma ümid edirəm. İndi ehtiyatlı olmaqdan və sağlıq durumumla bağlı düşünməkdən başqa seçimim yoxdu”.
Xatırladaq ki, ispaniyalı ulduz iyulun 7-də qarın əzələlərindəki yırtıq üzündən Uimbldon turnirinin yarımfinalından çəkilib. Monreal turniri isə avqustun 8-14-ü aralığında keçiriləcək.
Ötən həftəsonu bir başqa ulduzun – Novak Cokoviçin də Monreal turnirinə qatılmayacağı bəlli olub. Serblə bağlı problemin səbəbi hər kəsə bəllidi: o, koronavirisa görə peyvənd olunmaq niyyətindən uzaqdı. Bu arada Cokoviçin məşqçisi Qoran İvanişeviç serb tennisçi ilə çalışmağın nüansları haqda danışıb:
“Cokoviçin məşqçisi olmaq heç də həmişə asan deyil. Biz özündən və ətrafdakılardan hər şeyin ən yaxşısını tələb edən böyük çempiondan danışırıq. Məsələn, məşqdə hansısa qeyri-dəqiq zərbə üzündən o tam ağlını itirə bilər. İstənilən an əhval-ruhiyyəsinin dəyişməsi mümkündü. Düzgün balans tapmaq üün müəyyən zaman lazım gəldi. Zamanla anladım ki, bəzən, sadəcə, heç nə danışmamaq, ona bir az hava almaq imkanı yaratmaq lazımdı. Onun məşqçisi olmaq mənim üçün böyük şərəf və məmnunluqdu”.
Digər xəbərlər
