Çərşənbə günü “Ferentsvaroş”u qəbul edəcək “Qarabağ” bu gün “feysbuk” hesabında azarkeşlərə aşağıdakı müraciəti ünvanlayıb: “Nəzərinizə çatdırmaq istəyirik ki, “Qarabağ” FK-nın ev oyunlarında bilet satışı və paylanılması ilə bağlı bütün səlahiyyətlər bundan sonra “iTicket” şirkətinə həvalə edilmişdir. Biletlərlə bağlı hər hansı istək və suallarınız yaranacağı təqdirdə “iTicket” şirkətinə müraciət etməyiniz xahiş olunur”.
Elə bu müraciətin altında yazılan şərhlərdən aydın olur ki, azarkeşlər səhahiyyətlətin “iTicket”ə verilməsindən birmənalı şəkildə narazıdı. “Qarabağ”dan bir gün sonra meydana çıxacaq “Neftçi”nin “Rapid”lə oyununun biletləri artıq satışda olduğu halda, çempionun ləngiməsi də azarkeşləri narazı salan bir başqa məqamdı. “Football-plus.az” saytı olaraq, bütün bu suallara aydınlıq gəitrmək üçün klubun mətbuat katibi Gündüz Abbaszadənin fikirlərini öyrəndik: “Klubumuz tərəfindən dəvətnamələrin paylanılması səlahiyyəti bizdə idi. Azarkeşlərin və müraciət edənlərin istəyini başa düşürdük və onları biletlə təmin etməkdə əlimizdən gələn köməyi göstərməyə çalışırdıq. 30 min bilet satışa çıxırdısa, onun üçdəbiri, bəzən isə ikidəbiri dəvətnamə kimi paylanılıb. Bu da müqaviləmiz olan “iTicket” şirkətinin işinə və bilet satışına təsir edirdi. Bütün bunları nəzərə alaraq, həm dəvətnamələr, həm də satışa çıxarılan biletlərlə bağlı bütün səlahiyyətlər “iTicket” şirkətinə həvalı olunub. Biletlər artıq sabahdan satışda olacaq. Bəzi texniki detallar var ki, hazırda onların üzərində iş gedir. Bu gün, yəni gün ərzində satışla bağlı elan paylaşacağıq”.
ORXAN