“Turan Tovuz” ötən mövsüm komandanın uğurları üçün çalışan 7 futbolçu ilə yeni müqavilə bağlayıb. Bu haqda klubun mətbuat xidməti məlumat yayıb. Akif Tağıyev, Abbas Ağazadə, Səbayıl Bağırov, Mehman Hacıyev, Faiq Hacıyev, İzzət Müştaqov və Famil Camalov daha bir mövsüm premyer-liqa klubunun uğurları üçün çalışacaq.
Son vaxtlar klubun düşərgəsində yaşanan xoşagəlməz vəziyyətə də toxunmaq istəyirik. 9 ildən sonra premyer-liqaya qayıdan “boz qurdlar”ın ətrafında futboldan uzaq adamlar dolaşmağa başlayıb. Necə deyərlər, şəxsi mənafeyini düşünüb pul qoxusuna gələnlərin sayı artıb. Belə ki, Tovuzdan redaksiyamıza daxil olan məlumata görə, bu yöndə xüsusilə rayonun gənclər və idman idarəsinin rəisi Sahib Ələsgərov ilk sıradadı. Komanda aşağı dəstədə çıxış etdiyi illərdə bir dəfə də stadiona gəlməyən məmur son vaxtlar “Turan Tovuz”un düşərgəsindən əl çəkmir. İcra başçısı Məmməd Məmmədova klub rəhbərliyi barədə yanlış məlumatlar ötürməklə özünü başçının yanında hörmətə mindirmək istəyən Sahib bəyin çalışdığı odu ki, “Turan Tovuz”da söz sahiblərindən biri olsun. Daha dəqiq desək, dövlətin kluba ayıracağı maliyyəyə nəzarəti öz əlinə alsın. Tovuzdakı mənbəmizin sözlərinə inansaq, idarə rəisi dövlətin gənclər və idman siyasətini şəxsi mənafeyinə qurban verir, Tovuzun idman ictimaiyyəti də ondan narazıdı. Söylənilənlərə inansaq, Sahib bəyin əsas məqsədi klubun möhürünü ələ keçirmək olub ki, icra başçısına yalan informasiyalar ötürməklə istəyinə çatıb. Mənbəmiz onu da vurğuladı ki, bu adam klubda heç bir post tutmamasına baxmayaraq, möhürü ələ keçirib, özünü rayonda klubun yiyəsi kimi təqdim edir.
Belə, əziz oxucular. 9 ildən sonra böyük futbol Tovuza qayıdıb və deyəsən, özü ilə bərabər böyük intriqalara rəvac verib. Bu günə kimi stadionun yolunu tanımayanlar, futbolla maraqlanmayanlar pula görə özlərini futbol bilicisi, yüksək səviyyəli təşkilatçı kimi ictimaiyyətə təqdim edir. Bu gedişlə yeni mövsümdə “Turan Tovuz”un nəticələrindən çox klubun ətrafında yaşanan söz-söhbətlər gündəm olacaq.
RƏŞAD