Cənubi Afrika Respublikası “Qran-pri”sini çempionatın təqviminə qaytarmaq üçün davam edən danışıqlar çərçivəsində “Formula-1” və Beynəlxalq Avtomobil Federasiyası (FİA) nümayəndələri çərşənbə axşamı Kyalami trassını yoxlayıblar.

Football-plus.az xəbər verir ki, “Formula-1”in idman direktoru Stiv Nilsen, eləcə də mühəndislər Kreyq Vilson və Riçard Sprinqett trassda olublar. Dünən Kyalamiyə FİA-da yarış trasslarının təhlükəsizliyinə cavabdeh olan Stüart Robertsonun səfəri planlaşdırılmışdı. Təftişin məqsədi Kyalamidə hansı işlərin görülməli olduğunu öyrənməkdi ki, trass “Formula-1” yarışlarına evsahibliyi etmək üçün “Grade 1” lisenziyası ala bilsin.

Hazırda trass “Grade 2” lisenziyasına malikdir və konfiqurasiyada bəzi təkmilləşdirmələr tələb olunur. Söhbət ilk növbədə çınqıllı təhlükəsizlik zonalarının asfaltla döşənməsi və genişləndirilməsindən, bir neçə döngənin formasının dəyişdirilməsindən, helikopter meydançasının yeni yerə köçürülməsindən və paddokda, eləcə də bokslarda müəyyən işlərin aparılmasından gedir. Qeyri-rəsmi məlumatlara görə, yenidənqurma işləri 4-6 milyon dollar həcmində qiymətləndirilir və yekun investisiya “Formula-1” ilə FİA-nın konkret tövsiyələrindən asılıdır. Eyni zamanda, problemlərdən biri də belə layihənin həyata keçirilməsinə getdikcə daha az vaxtın qalması ilə bağlıdı. Adı açıqlanmayan bir insayderin dediyinə görə, “artıq avqusta az qalıb, amma apreldə yarış keçirməyi hədəfləyirlər”.

Trassın sahibi Tobi Venter Cənubi Afrika “Qran-pri”sinin Kyalamiyə qayıtmasını istəyir, lakin bunun üçün istənilən məbləği ödəməyə hazır deyil. CAR hökumətinin yarış layihəsində birbaşa iştirakdan imtinasını nəzərə alsaq, yenidənqurma xərclərini kimin ödəyəcəyi hələlik bəlli deyil.

Real vəziyyətlə tanış olan jurnalistlər Kyalami mərhələsini 2024-cü ilə qədər təxirə salmağın və gələn mövsüm ənənəvi və sevimli Belçika “Qran-pri”sini keçirməyin daha ağlabatan olacağını düşünürlər. İş ondadı ki, təqvimdə Spadakı yarışın yerini məhz CAR mərhələsi tutmalıydı.