Nəhayət, Usman Dembelenin məsələsinə aydınlıq gəlib.

O, yeni mövsümə də son klubunda başlayacaq.

Usman uzun müddət “Barselona” rəhbərliyinin təklif etdiyi yeni müqaviləni imzalamaqdan imtina edirdi. Nəhayət, iyulun 1-dən azad agent statusuna malik olan futbolçunun “Barselona” ilə ikiillik müddətə anlaşdığı xəbər verilir. 25 yaşlı fransız hücumçu məvacibinin 40 faiz azaldılmasına razılaşıb. Usman yeni mövsümdən Anssumane Fatinin aldığı maaşla kifayətlənməli olacaq. Dembele “Barselona”da 2017-ci ildən çıxış edir. O, son mövsüm bütün turnirlərdə iştirak etdiyi 32 matçda komandasına 2 qol və 13 məhsuldar ötürmə ilə faydalı olub.

İspaniya klubu heyətini yeni futbolçu ilə də gücləndirib. “Lids”dən Rafinya transfer edilib. Klubun mətbuat xidmətinin məlumatında braziliyalı vingerin tibbi müayinədən keçdikdən sonra rəsmi müqavilə imzalayacağı bildirilib. Rafinyanın transferi İngiltərə klubuna 58 milyon avro qazandırıb. 26 yaşlı oyunçu “Lids”ə 2020-ci ildə “Renn”dən keçmişdi. O, ötən mövsüm premyer-liqada iştirak etdiyi 35 oyunda 11 qol vurub və 3 qolun ötürməsini verib.
“Barselona”nın əsas transfer hədəfinin Robert Levandovski olduğu çoxlarına bəllidi. Rəhbərlik polşalı hücumçu üçün “Bavariya”ya son təklifini göndərib. “Sport.es” saytının xəbərinə görə, münhenlilərə 50 milyon avro təklif edilib. “Barselona” “Bavariya”nın bu təklifi qısa zamanda qəbul etməsini istəyir. İspaniya klubu hücumçuya isə “3+1 il”lik müqavilə təklif edib. Bəzi mənbələr Levandovskinin Kataloniyanın inzibati mərkəzinə mümkün qədər tez getməyi düşündüyünü vurğulayır. Onun PSJ və “Çelsi” kimi klublardan aldığı təkliflərlə maraqlanmadığı da qeyd edilir. Robert növbəti mövsümü “Bavariya”da keçirmək istəmədiyini çoxdan açıqlayıb. Onun klubla müqaviləsinin müddəti 2023-cü ilin yayında sona çatacaq. Bu səbəbdən “Barselona” superbombardirə görə heç də az xərcə düşməyəcək.

Yeri gəlmişkən, Robert “Barselona”ya mümkün transferinə baxmayaraq, Münhen klubunun düşərgəsinə qoşulub. Maraqlıdı ki, “Sport1” telekanalının xəbərində onun internetdə çoxsaylı ölüm hədələri aldığı üçün Münhenə həyat yoldaşı və uşaqlarını gətirmədiyi bildirilib. 33 yaşlı oyunçunun “Barselona”ya keçidinin rəsmiləşməsini səbirsizliklə gözlədiyi də qeyd edilib. Robert dünən komanda ilə məşqlərdə iştirak edib. Münhen klubu hazırlıq prosesindən sosial şəbəkə hesablarında fotolar paylaşıb.

“Barselona”nı daha bir oyunçunun tərk etdiyini də bildirək. Müdafiəçi Kleman Lanqle, gözlənildiyi kimi, karyerasını “Tottenhem”də davam etdirəcək. London klubu fransalı oyunçunu birilliyə icarəyə götürüb. Xatırladaq ki, Lanqle “Barselona”ya 2018-ci ildə “Sevilya”dan transfer olunub.
Fransişko Trinkan isə növbəti dəfə icarəyə verilib. 22 yaşlı yarımmüdafiəçi karyerasını “Sportinq”də davam etdirəcək. Onunla birillik müqavilə imzalanıb. Qeyd edək ki, Trinkan ötən mövsümü icarə əsasında “Vulverhempton”da keçirib.