“Qarabağ”ın baş məşqçisi Qurban Qurbanov Çempionlar Liqasının 1-ci təsnifat mərhələsində “Lex”lə keçiriləcək cavab görüşü öncəsi mətbuat konfransında iştirak edib.

Football-plus.az xəbər verir ki, 50 yaşlı mütəxəssis Poznandakı 0:1 hesablı məğlubiyyətə baxmayaraq, yetirmələrinə güvəndiyini söyləyib:

- Komandanı 90, yoxsa 120 dəqiqəlik mübarizəyə hazırlamısız?
- Hər şeyni nəzərə almışıq. Xüsusən də, indiki sistemdə buna daha çox hazırlaşırıq. Amma çox istərdim ki, 90 dəqiqədə hər şey bizim istədiyimiz kimi yekunlaşsın.

- Heyətdə hansısa dəyişiklik olacaq?
- Ola bilər.

- Komandanız döyüşə hazırdı?
- Yaxşı oyuna hazırıq. İnanıram ki, futbolçularım o hissləri yenidən meydanda göstərəcək, aktiv mübarizə aparacaqlar.

- Əvvəlki illərdə "Qarabağ"ın geridönüş etdiyini görmüşük. Bu barədə ictimaiyyətdə narahatlıq var. Bu, sizdə əlavə təzyiq yaradır?
- Dəfələrlə belə hallar olub. Bunu normal qarşılayırıq. İnanmıram ki, təzyiq yaratsın. Sadəcə bir az inamsızlıq yaranması mənə təsir edə bilər. Amma ümumən ilboyu gedən prosesdir. Kimsə tənqid edir, kimsə tərifləyir. Əsas odur ki, inamsızlıq olmasın. Futbolçular hiss eləməlidirlər ki, onlara güvənirlər. Belədə onlar daha istəkli və məsuliyyətli olurlar.

- 2-ci Vətən müharibəsində xalqımız bir oldu. Sabahkı oyunla bağlı da birlik üçün azarkeşlərə mesajınız var?
- Azarkeş futbolun ən vacib hissəsindən biridir. Azarkeş kütləsi futbolçulara əlavə motivasiya, inam, məsuliyyət verir. Çox istərdim ki, sabah stadion tam dolu olsun. Amma inanıram ki, 10 milyon azərbaycanlı bizimlədi, kimisi stadionda, kimisi evdə, kimisi işdə azarkeşlik edəcək. Bu dəstəyi hiss edəcəyik. Hər biri "Qarabağ"ın uğurlu nəticəsini istəyir.

- Heyətlə bağlı problem varmı?
- Qara Qarayevin durumu sual doğurur. Bu gün məşqdə onunla bağlı məsələ müəyyənləşəcək.