“Mançester Yunayted”i tərk etmək qərarına gələn Kriştiano Ronaldonun “Çelsi”də qərar tutmaq şansı praktiki cəhətdən heçə enib.
Səbəb paytaxt komandasını çalışdıran Tomas Tuxelin onun xidmətində maraqlı olmaması ilə bağlıdı. Alman mütəxəssis Ronaldonun gəlişi ilə komandasının oyun balansının pozula biləcəyindən ehtiyatlanır.
Artıq Kriştianonun adı PSJ ilə birgə hallanır. Portuqaliyalı insayder Pedru Almeydanın verdiyi məlumata görə, Paris klubunun futbol məsələləri üzrə məsləhətçisi Luiş Kampuş mümkün transferlə bağlı ulduz futbolçunun agenti Jorje Mendeşlə təmas qurub.