“Qarabağ” ilk oyunda gözlənilmədən uduzdu.

Bəs futbolsevərlərin komandaya inamı, cavab görüşündə qələbəyə inanı qalıbmı? – srağagün bu suala cavab tapmaq ümidi ilə Tofiq Bəhramov adına Respublika stadionunun kassalarına yaxınlaşdım. Bir məqamı da xatırladım ki, Poznanda keçirilən ilk oyunu 25118 tamaşaçı stadiondan izləyib. Bu isə 1-ci təsnifat mərhələsinin oyunları arasında ən yüksək göstəricidi. Hər halda, ilk görüşdə məğlubiyyət qeydə alındığına görə görə, ola bilər ki, Bakıda azarkeş izdihamı yaşanmasın. Həmçinin nəzərə alaq ki, əvvəlki illərdən fərqli bu dəfə biletlərin qiymətində də dəyişiklik var. Daha öncə təsnifat mərhələlərindəki oyunlara ən ucuz bileti 3 manatdan alırdıqsa, artıq bu məbləğ 5 manatdı.
Öncə nəzərinizə çatdıraq ki, kassalar səhər saat 11.00-da açılır. Məkana yollanmamış bir neçə dostumla əlaqə saxladım. Oyuna getmək istəyirlərsə, onlara da bilet alım deyə. Təbii ki, dərhal qiyməti soruşdular. Lakin “5 manat” deməyim onları həvəsdən salmadı. Bilet satılan məntəqələrdə məndən başqa, iki nəfər də təxminən 30 dəqiqə kassanın açılmasını gözlədi. Onların komandamızın çıxışı barədə müzakirəsinə qatıldım. Görünən odu ki, azarkeşlər “Qarabağ”dan razıdı və qələbə gözləyirlər. Bu müddət ərzində isə pulsuz bilet əldə edib eyni qiymətə satanlar boş durmurdu. İki nəfər onların fəaliyyətindən yararlandı. Kassanı gözləyənlərə “5 manatlığın yuxarı sıraları bizdə var” deməklə razı salırdılar. Əlbəttə, biletin eyni qiymətə satılmasına təəccübləndim. Onlarla qısa söhbətim zamanı bu biletləri necə əldə etdiklərini öyrənməyə çalışdım. Satıcılar isə tanış şirkətlərin alıb onlara verdiyini, ona görə də məbləği dəyişmədən satdıqlarını söylədilər.
Nəhayət, kassalar açıldı və iki nəfər yaxınlaşdı. Mən hələ kənarda gözləyirəm. Təxminən 7-8 dəqiqə davam edən qeyri-məlum müzakirələrdən sonra onlardan biri kassadan ayrıldı. Əliboş qalmasına təəccübləndim. Nədən narazı olduğunu bilmədim, amma pulsuz bilet əldə edib satanlardan birini sevindirdi. Gördüyüm ab-havaya uyğun olmadığı üçün onu da deyim ki, bu şəxs 10 manatlıq bilet almaqla başqalarından fərqləndi. Sonra daha 2 nəfər də kassadan bilet alaraq uzaqlaşdı. Başqa biri isə daha bir neçə dəqiqə kassanın qarşısında durandan sonra, nəhayət, 2 dənə 5 manatlıq bilet alıb sağollaşmaq istədi ki, digər kassada alıcılardan birinin problemini görüb ona yardım etdi. Şəxsiyyət vəsiqəsini gətirmədiyi üçün ona bilet vermirdilər. Artıq biletləri hazır olan adam da ona öz şəxsiyyət vəsiqəsini təqdim edərək bileti bununla almasını istədi. Beləcə daha bir bilet satıldı. Bundan sonra kassaya yaxınlaşdım. 19-cu sektor üçün 2 bilet sifariş verdim. Satıcı bu sektorda ancaq aşağı sıraların boş qaldığını xatırlatdı. Əlacsız qalıb ən uyğun 2 bileti istədim və nəhayət, 20-ci sektorun 22-ci sırası üçün bilet əldə edə bildim. Əlavə olaraq isə 10 və 20 manatlıq sektorlarla maraqlandım. Həmin sektorlarda yuxarı sıraların boş qalmasından anladım ki, azarkeşlər əsasən 5 manatlıq biletləri alıb.

Bilet satışında izdiham olmadığı üçün ərazidə heç bir nəzarət yox idi. Nə polis, nə də mühafizə xidməti fəaliyyət göstərirdi. Qarşıdakı günlərdə hər şeyin dəyişəcəyi, kassalar önündə izdiham yaşanacağı şübhə doğurmur. Çünki azərbaycanlı azarkeşlər, adətən, bu problemi oyun günü həll etməyə öyrəşib.

ŞAİR ABDULLA