Təxminən 35 günlük istirahətin ardından “Sumqayıt” da bu gün yeni mövsümün hazırlığına start verdi.

Təlim-məşq toplanışının ilk mərhələsini doğma şəhərdə keçən “kimyaçılar”ın birinci məşqi daha çox fiziki təmrinlər üzərində qurulmuşdu. Aleksey Baqanın yeni köməkçisi Rail Məlikovun da iştirak etdiyi hazırlıq prosesində Vurğun Hüseynov və Höccət Haqverdinin yoxluğu diqqət çəkdi. Klubun mətbuat katibi Rəşad Məmmədovdan aldığımız bilgiyə əsasən hər iki futbolçu icazəlidi və sabahdan kollektivə qoşulacaq.

Ehtiyat meydanda baş tutan məşqdən sonra “kimyaçılar”ın baş məşqçisinə yaxınlaşıb yeni mövsüm və bizi maraqlandıran başqa suallar ətrafında söhbətləşdik.

- Uğursuz keçən ötən mövsümdən sonra, yeni “futbol ili” barədə nə düşünürsüz?
- Yeni mövsümə hazırlığı, demək olar ötən “futbol ili”nin son matçından sonra başlamışıq. Bildiyiniz kimi, mövsümlərarası fasilədə bəzi aparıcı futbolçularımız komandanı tərk edib ki, bunu da normal qarşılayıram. Müqavilələrinin müddəti başa çatdı və başqa klubların təkliflərini dəyərləndirdilər. İndi komandanın formalaşdırmaq barədə düşünmək lazımdı.

- Gedənlərin yerini doldura biləcək, ən azı onlar səviyyədə futbolçu tapa biləcəksiz? Hazırda “Sumqayıt” “transfer bazarı”nda ən passiv klublardan biridi...
- Vaxtın az olduğu məlumdu. Yaxşı olardı ki, yeni transferlərlə bir qədər tez anlaşardıq. Ancaq reallıqla barışmalıyıq. Elə etməliyik ki, komandaya yeni dəvət edəcəyimiz futbolçular səviyyə baxımından gedənlərdən üstün olsunlar. Komandanı yalnız belə gücləndirə bilərik. Bəli, çətin olacaq, nəzərə almaq lazımdı ki, gedənlərin əksəriyyəti yığmaya cəlb olunan oyunçular idi. Ancaq bu addımı atmalıyıq.

- Artıq “Sumqayıt”a legioner transfer etmək icazəsi verildi. Maraq dairənizə düşən əcnəbilər var? Bu yerdə onu da xatırladım ki, mətbuatda bu yöndə bəzi xəbərlər yayılıb. Yazılanlara inansaq, meneceriniz klub rəhbərliyinə bir neçə legioner təklif etsə də, rəsmilər “bizim o qədər maaş vermək imkanımız yoxdu” deyib, onlardan imtina edib. Bu məsələyə də münasibət bildirmınizi istərdik.
- Əvvəlcə onu bildirim ki, mənim konkret olaraq agentim yoxdu. Yaxın münasibətim olduğu bir neçə agent var ki, onlar bu yöndə bizə kömək edə bilərlər. O ki qaldı onların “Sumqayıt”a futbolçu təklif etməsinə, belə bir şey olmayıb. Legioner transferinə icazə verilməsinə gəlincə, bu yaxşı məqamdı. İlk növbədə bizim gənclər onların yanında inkişaf edə bilərlər. İkincisi, gedənlərin əvəzinə legioner dəvət etməklə komandanın ümumi səviyyəsini yüksəldə bilərik. Baş məşqçi kimi müxtəlif millətləri təmsil edən futbolçularla işləmək mənim üçün də maraqlı olar.

- Bu gün Andrey Popoviçin komandadan ayrıldığı məlum oldu. “Çərçivə” problemini necə həll etməyi düşünürsüz?
- Elə alındı ki, komandanın ilk məşqində bizə belə xoşagəlməz məlumat verildi. Bu bizim üçün əlavə problem olacaq. Nəzərə alsaq ki, komandaya legioner transfer etmək icazəsi verilib, böyük ehtimalla, yerli qapıçı tapmayacağımız halda həmin mövqeyə əcnəbi dəvət edəcəyik. Mövsümün sonlarına yaxın Popoviçin gəlişi “çərçivə” ilə bağlı narahatçılığımızı bir qədər aradan qaldırmışdı. Xüsusilə son oyunlarda Andreyin inamlı performansı sayəsində qələbələr qazana bildik. Hətta eşitdiyimə görə, onu artıq yığmaya da namizəd kimi görürdülər. Təəssüf ki, o bizdən ayrıldı.

- Mövsümlərarası fasilədə həmyerliniz Viktor Qonaçarenko “Neftçi”nin baş məşqçisi olmağa namzidələrdən biri idi. Vaxtilə bir yerdə çalışdığınızı nəzərə alsaq, məntiqlə 45 yaşlı mütəxəssis təklifdən sonra sizdən Azərbaycan futbolu barədə maraqlanmalı idi. O bunu etmişdi?
- Bilirəm ki, onunla ciddi maraqlanmışdılar. Həmin ərəfədə Viktor Mixayloviçə başqa təkliflər də olduğundan başı qarışıq idi. Özü ilə danışmasam da, köməkçisi Yermakoviç tez-tez əlaqə saxlayırdı. Yermakoviç Azərbaycan futbolunun ümumi səviyyəsi, klublar barədə məlumat verməyimi istəyirdi. Görünür sonda başqa variantlara üstünlük verməyi lazım biliblər.

RƏŞAD