Martin Hinteregger karyerasını başa vurub.

Məsələnin təəccüb doğuran tərəfi odu ki, “Ayntraxt”ın avstriyalı müdafiəçisi 29 yaşında peşəkar futbolla vidalaşmaq qərarını verib.

Bu barədə Frankfurt klubunun mətbuat xidməti məlumat yayıb. Rəsmi məlumatda onun müddəti 2024-cü ilin yayına qədər olan müqaviləsini qarşılıqlı razılıq əsasında pozduğu bildirilib, amma futbolla səhhətində hər hansı ciddi problemi olmadan belə erkən vidalaşmasının dəqiq səbəbi göstərilməyib.
Amma Almaniyada çıxan bir qəzet Martinin yaşıl meydanı niyə tərk etdiyinə aydınlıq gətirib. “Suddeutsche Zeitung” nəşri onun Avstriyanın ultrasağçı Azadlıq Partiyasının üzvü olan bir siyasətçi ilə biznes əlaqəsinə görə jurnalist tərəfindən tənqidə məruz qalmasına dözə bilmədiyini iddia edir. Halbuki futbolçu bir müddət əvvəl sağ təmayüllü, təmkinsiz və rəhimsiz ideyalara qarşı olduğunu dilə gətirmişdi. “Zaltsburq”un yetirməsi olan Hinteregger peşəkar karyerasının 2010-15-ci illərini bu klubda keçirib. 2016-cı ildə icarə əsasında bir neçə ay Münhenqladbax “Borussiya”sında oynayıb. 2016-19-cu illərdə “Auqsburq”un şərəfini qoruyan futbolçu “Ayntraxt”ın sıralarına 2019-cu ildə qoşulmuşdu. Bu klubla son mövsümdə Avropa Liqasının qalibi olan Martin Avstriya yığmasında 67 oyuna 4 qol vurub.