“Bakı klubu bu mütəxəssisin rəhbərliyi altında uğur qazana biləcək” - "Xəzər Lənkəran"ın sabiq mətbuat katibi
İyunun 8-də Samir Abasovla yollarını ayırdığını açıqlayan "Neftçi" rəhbərliyi srağagün yeni baş məşqçini ictimaiyyətə təqdim etdi.
“Ağ-qaralar”ın “sükan”ı rumıniyalı Laurensiu Regekampfa tapşırıldı. 46 yaşlı mütəxəssislə ikiillik razılaşma əldə olunub.
Ölkənin ən köklü klubunun yeni çalışdırıcısının adı məlum olar-olmaz sosial şəbəkələrdə, mediada onunla bağlı fərqli fikirlər səslənməyə başladı. Diqqətçəkən paylaşımlardan biri də vaxtilə bakılıların çempionatda əsas rəqiblərindən olan “Xəzər Lənkəran”ın mətbuat katibi Hüseyn Cəbrayıloğluya məxsusdu. Sən demə, həmakarımız Regekampfla hələ 11 il əvvəl tanış olub:
“Neftçi" nin yeni baş məşqçisi bir müddət "Xəzər Lənkəran"ın düşərgəsində olub. 2011-ci ildə komandanın Avstriya toplanışında Mirça Rednikin dostu kimi bir müddət qonaq kimi məşqlərdə iştirak etdi”.
46 yaşlı mütəxəssis Hüseyn bəyin yaddaşında nə ilə qalıb? Bu suala cavab tapmaq üçün artıq tarixin yaddaşına köçmüş “yaşıl armada”nın sabiq mətbuat katibi ilə əlaqə saxladıq:
“Mirça Rednikin dönəmində, 2011-ci ilin yayında komanda Avstriyada - təlim-məşq toplanışında idi. Bir gün gördüm ki, məşqçi formasında bir nəfər komandanın hazırlığına qoşulub. Maraqlananda dedilər ki, Rednikin dostudu, məşqçi fəaliyyətinə yeni başlayıb. Təxminən 3-4 gün məşqlərdə iştirak etdi. Hazırlıq prosesini izləyirdi, bəzən futbolçularla bir yerdə meydanda olurdu. Sonrakı illərdə klubun düşərgəsində rumın futbolçular, məşqçilər arasında söhbət düşəndə hamı Laurensiu Regekampfı son illərdə Rumıniyanın üzə çıxan ən perspektivli gənc məşqçisi kimi təqdim edirdilər. Həmin dönəmdə “Neftçi”nin hazırkı baş məşqçisi “Stayua”da, ərəb klublarında çalışmamışdı, böyük uğurlara imza atmamışdı. Baş məşqçi təyinatına qədər “Neftçi” azarkeşləri vaxtın az olduğunu dilə gətirib, narahat qalmışdılar. Fikrimcə, Regekampfın gəlişi ilə narahatlıq aradan qalxacaq. Onu da unutmaq lazım deyil ki, Rumıniyanın tanınmış agenti Anna Mariya Prodan onun həyat yoldaşıdı. Vaxtilə “Xəzər Lənkəran”a gəlmiş bütün tanınmış oyunçuların keçidi həmin xanım vasitəsilə həll olunurdu. Məncə, qısa vaxtda “Neftçi”yə səviyyəli futbolçular transfer olunacaq. Əzəli və əbədi rəqibimiz olmalarına baxmayaraq, düşünürəm ki, Bakı klubu bu mütəxəssisin rəhbərliyi altında uğur qazana biləcək”.
Hüseyn bəy bizimlə söhbətdə tanınmış rumıniyalı agentin Regekampfın həyat yoldaşı olduğunu bildirsə də, xatırladaq ki, cütlük ötən ilin oktyabrında ayrılıb. Belədə onların işbirliyi nə dərəcədə real görünür? Bir də “Neftçi” rəhbərliyi transfer məsələlərini tam rumın məşqçiyə tapşırmaqla nə dərəcədə düzgün addım atmış olacaq? Hər halda, unutmayaq ki, Rednikin dönəmində “Xəzər Lənkəran”da transfer məsələlərinə görə camiədə xoşagəlməz söz-söhbət yaranmışdı. Hüseyn bəyin bu məsələyə reaksiyası belə oldu:
“Rednik kimi camiənin içinə girə biləcəyini düşünmürəm. Burda bir çox amil var ki, sevilmək məsələsini bir kənara qoysaq, ümumilikdə uğurlu olacağına inanıram. Həyat yoldaşından ayrılsa da, bunun onların iş münasibətinə də təsir edəcəyini düşünmürəm. Mental dəyər baxımından onlar üçün bu nəyisə dəyişmir və iş-biznes baxımından hər ikisi üçün yeni bazar yaranıb. Hətta bu olmasa belə, etiraf edək ki, Rumıniyada yaxşı futbolçu çoxdu və Anna Mariya olmadan da onları dəvət etmək mümkündü. Mən Zaur Əzizovun da təcrübəsinə inanıram və düşünürəm ki, Rumıniyada kiminlə nə iş görmək lazım olduğunu gözəl bilir”.
RƏŞAD
Digər xəbərlər
