Avropa çempionu olan mini-futbol yığmamızın kapitanı komandanın ən yaşlı oyunçusu idi.

Söhbət 44 yaşlı qapıçı Ramin Həsənzadədən gedir. Zədə üzündən turnirdə yalnız startda oynayan, onda da yekunda Avropa çempionatının ən yaxşı qapıçıs seçiləcək Davud Kərimiylə əvəzlənən Həsənzadə də jurnalistlərin suallarını cavabladı.

- Hazırda burda möhtəşəm ab-hava var. Belə qarşılanmanı gözləyirdiz?

- Bəli. Hələ Slovakiyada olanda artıq bizə xəbər çatmışdı ki, möhtəşəm qarşılanma olacaq. Hamımız bu gözəl ab-havanı gözləyirdik və bunu yaşadanların hər birinə minnətdarıq.

- Turnirdən öncə çempion olacağınıza inanırdız?

- Birinci Avropa çempionatında - Ukraynada keçirilən yarışda da iştirak etmişdim. Budəfəki turnirə yollanmamışdan öncə bir müsahibə vermişdim və demişdim ki, Slovakiyaya çempion olmağa gedirik. Həmin videoçarxlar internetdə var. O vaxt hamı mənə bir az güldü, dediyimi ciddi qəbul etmədilər. İndi isə həmin çıxışım olan videoçarxı çoxları paylaşır ki, bəs öncədən deyilmişdi.

- Bu inamın nəyəsə söykənməli idi axı...

- Bilirsiz, 4 ildi bu yarışa hazırlaşırdıq. Pandemiya dönəmində uşaqlar SMS-lə icazə alıb, gəlib məşq edirdilər. 2 saat vaxt götürüb, 1 saat məşq edib qayıdırdılar. Yayda o istidə hamı dincəlirdi, biz 40 dərəcədə məşq edib yarışa hazırlaşırdıq. Yəni elə bir hazırlıq idi ki, nəticəsi də olmalıydı. İnşallah, oldu da. Dörd ildə o qədər hazırlaşmışıq ki, başqa cür ola bilməzdi. Əziyyətimiz bəhrə verdi.

- Kapitan olsan da, turnirdə az oynadın. Startda Rumıniyaya qarşı çıxış etdin, sonradan əsasən həmkarın Davud Kərimi qapını qorudu...

- Rumınlarla birinci oyunun gedişində çiynimdən zədə aldım, nəticədə Davud qapıda dayandı. Bu yığmadı, burda milli dəyərlər var. Zədələnməyimdən sonra Davudun oynaması bəlkə də onun parlaması baxımından böyük bir şans oldu. Şükürlər olsun Allaha ki, Avropa çempionatının ən yaxşı qapıçısı oldu. Millimizdə ən yaxşılardan biri idi.

- Davuda hansı məsləhətləri verirdin?

- Hər oyuna gedəndə də, fasilədə də danışırdıq, məsləhətləşirdik. Nə lazımdısa, hamısını ona ötürürdüm.

- Karyeran daha çox futzala bağlı olub, zirvəyə isə mini-futbolda çatdın. Necə müqayisə aparardın?

- Necə deyim sizə, 44 yaşında Avropa çempionu olmaq fərqli hissdi. İdman növünün fərqi yoxdu. Mini-futbolda bunu bacardıqsa, Alaha min şükür!

- Kapitan kimi kuboku başı üzərinə qaldıranda hansı hissləri keçirdin?

- Bunu sözlə çatdırmaq olmaz, gərək yaşayasan. Onda hər şey yaddan çıxır, bayraq ucalır, himn səslənir… Bundan vacib heç nə ola bilməz!

- Bu yaşdan sonra da çıxışını davam etdirməyi düşünürsən?

- Bəli. İnşallah, qarşıda bizi dünya çempionatı gözləyir. Ora da iddialı yollanacağıq. Özü də Avropa çempionu statusunda.

- İndidən deyə bilərsənmi ki, dünya çempionu olacağıq? Sonradan bunu xatırladaq…

- (gülür) Dünya çempionu yox, “mükafatçısı” deyərdim.

İLKİN SULTANLI