Azərbaycan millisi sabah Millətlər Liqasında növbəti matçına çıxacaq.

Rəqib adlı-sanlı futbolçulara malik Slovakiya yığması olacaq. Nə qədər gözlənilməz və utopik səslənsə də, bu görüşdə mütləq qələbə qazanmalıyıq. Çünki əks təqdirdə yığmanın C Liqasının 3-cü qrupunda lider olmaq şansı minimuma enəcək. Bu səbəbdən də qələbə mütləqdi. Bunun üçün də meydana hücum potensialı güclü olan komanda çıxarmaq lazımdı. “Futbol+” olaraq De Byazi üçün heyət formalaşdırmışıq.

Yenə qeyd edirik, komanda mütləq qələbə qazanmalıdı. De Byazi 3 xalı hədəfləyirsə, 4-3-3 düzülüşündən istifadə etməli və buna uyğun futbolçuları meydana buraxmalıdı. Sözsüz ki, qapıda Şahruddin Məhəmmədəliyev olmalıdı. Müdafiənin solunda Azər Salahlı, mərkəzdə ötən oyun özünü sübut edən Cəlal Hüseynovla Höccət Haqverdi, sağda isə Maksim Medvedev yer almalıdı. Yarımmüdafiənin dayağında “Neftçi”nin əsas üzvü Eddi İsrafilov oynamalıdı. Mərkəzdə hücumları Emin Mahmudovla Aleksey İsayev təşkil etməlidi. Ramil Şeydayev sol, Namik Ələskərov isə sağ vinger olaraq çıxış etməlidi. De Byazinin qol ümidi isə Renat Dadaşov olmalıdı.

Bəziləri üçün maraqlı ola bilər ki, De Byazi nə üçün bu heyətə güvənməlidi? Gəlin, bunu izah edək. Şahruddin ölkənin ən yaxşı qapıçısıdı. Dağıstanlı qolkiper bunu çoxdan sübut edib. Azər həm müdafiəçi, həm də yarımmüdafiəçi kimi oynamaq bacarığı ilə Toral Bayramovu üstələyir. Bu səbəbdən də De Byazi “Neftçi”nin üzvünə güvəvməlidi. Cəlal bu mövsüm “Zirə”də özünü yaxşı tərəfdən göstərib. Gənc müdafiəçi Belarusla matçda millinin heyətində daim oynamalı olduğunu sübut etdi. Höccət isə həm təcrübə, həm də fiziki cəhətdən Bəhlul Mustafazadədən daha yaxşı olduğu üçün bu görüşdə meydanda olmalıdı. Təbii ki, kapitan Maksimdən başqa kimsə müdafiənin sağında özünü yaxşı tərəfdən göstərə bilməz. Nə üçün Qara yox, Eddi? Çünki Slovakiya sürətli hücumlar quran komandadı. İsrafilovun fiziki durumu Qaradan daha yaxşıdı. Topla davranış bacarağı və texnikası da Eddini 1:0 önə keçirir. Emin millinin ən yaxşı oyunçusudu. O, həmişə əsas heyətdə çıxış etməlidi. Aleksey isə texnikası və oyun praktikasına görə başqalarını üstələyir.

“Sabah”ın yarımmüdafiəçisi istənilən zaman rəqib üçün təhlükə yarada bilər. Açığı, etiraf edək ki, bu heyətdə ən “zəif bənd” Şeydayevdi. Lakin bu vəziyyətdə belə “Qarabağ”ın forvardı vinger kimi özünü yaxşı tərəfdən göstərə bilər. Onun texnikası və sürəti buna imkan verir. Namik sağ cinahda özünü təsdiqləmiş vingerdi. Hazırda bu mövqedə ondan güclü yoxdu. Yarımmüdafiəçi həmçinin pleymeyker kimi də çıxış edə bilir. Onun funksionallığı komandaya kömək edə bilər. Renatın hücumun sivri ucunda yer alması bir çoxlarına qəribə görünə bilər. Amma Mahir Emreli hazırda özünü yaxşı tərəfdən göstərə bilmir və milliyə xeyir verəcək durumda deyil. Qazaxıstanla oyunda 1 metrdən topu qapıdan keçirə bilmədi. Bu səbəbdən də Renatın Slovakiya ilə matçda əsas heyətdə yer alması daha düzgün qərar ola bilər.

Sözsüz, bu, ehtimal olunan heyətdi. Yekun qərarı Canni de Byazi verəcək. İtaliyalının beynində nələrin dolaşdığını isə heç kim bilmir.

İLKİN SULTANLI