Deyəsən, Türkiyə futbolunda bir ilk yaşanacaq.

Belə ki, qardaş ölkənin futbolunda ilk dəfə bir klub əcnəbi himayədarların tabeçiliyinə keçəcək. Söhbət bu mövsüm elitanı tərk edən ''Göztəpə''dən gedir. 1925-ci ildə qurulan və zəngin tarixə malik olan İzmir klubu danimarkalı iş adamı Rasmus Ankersenin tabeçiliyinə keçməyə çox yaxındı.

Xatırladaq ki, 2014-dən bəri ''Göztəpə''nin səhmlərinin böyük hissəsinə malik olan Mehmet Sepil martın 21-də istefa verdiyini açıqlamışdı. Daha sonra Sepilin Ankersenlə danışıqlar apardığı məlum olmuşdu. 39 yaşlı Ankersen iki dəfə İzmirə gələrək klubun stadionu, bazası, şəraiti ilə yaxından tanış olmuş və hətta ''Göztəpə'' - ''Altay'' derbisini stadiondan izləmişdi. Bir ara Sepillə Ankersen arasında danışıqlar maddi məsələlərdəki anlaşmazlıq üzündən dayandırılmışdı. Amma danimarkalı danışıqları yenidən bərpa edib və bu dəfə ilkin razılıq əldə olunub. Anlaşmanın detallarının təxminən 2-3 həftəyə rəsmən açıqlanacağı gözlənilir. ''Fanatik'' nəşrinin yaydığı özəl xəbərə inansaq, ''Göztəpə''nin səhmlərinin 70 faizi Ankersenlə serbiyalı milyarder Draqan Şolakın birlikdə yaratdığı ''Sport Republic'' şirkətinə keçəcək. Digər 30 faiz isə elə klubun indiki rəhbərliyində qalacaq. ''Sport Republic'' Londonda yerləşən və bir çox klubun səhmlərinin müəyyən hissəsinə yiyələnən şirkətdi. Anlaşma rəsmiləşdikdən sonra Ankersenin komandaya yeni oyunçular və yeni baş məşqçi gətirəcəyi güman olunur. Amma Türkiyə futbolunu hələ yaxından tanımadığı üçün o, ilk vaxtlarda Sepil ilə məsləhətləşməkdə davam edəcək. Yeni rəhbərlik bir mövsüm ərzində komandanın yenidən superliqaya qayıtmasına çalışacaq. Başqa sözlə desək, ''Sport Republic'' Türkiyə futboluna pul buraxan ilk xarici şirkət kimi tarixə düşəcək.

Bu məqamda Ankersenin özü ilə yaxından tanış olmaq tam yerinə düşər. 1983-cü ilə təvəllüdlü iş adamının futbola maraq göstərməsi təsadüfi deyil. O özü də vaxtilə futbolçu olub. Amma ''Midtüllann''ın heyətində peşəkar səviyyədə çıxdığı ilk rəsmi oyunda dizindən aldığı ağır zədə üzündən karyerasını artıq 19 yaşında bitirmək məcburiyyətində qalıb. Buna baxmayaraq, o vaxtdan bəri futboldan ayrılmayan Ankersen böyük işlər görməyi bacarıb. Məşqçi lisenziyasını aldıqdan sonra klubun akademiyasında işləməyə başlayıb. Tədricən Rasmusen əlaqələrini və maraq dairəsini genişləndirərək psixologiya kursları keçməyə, daha sonra isə psixoloji mövzuda kitablar yazmağa başladı. 2014-cü ildə onun ''Midtyullann''ın prezidenti vəzifəsinə gəlməsi ilə klubun tarixində yeni səhifə açıldı. O vaxta qədər heç vaxt çempion ola bilməyən komanda həm çempionluqları sıralamağa, həm də Çempionlar Liqasının qrup mərhələsində oynamağa başladı. 2015-də o, ''Brentford''un baş direktoru təyin olundu. Həmin il 1-ci liqada, yəni 3-cü divizionda çıxış edən klub 2021-ci ildə artıq premyer-liqaya vəsiqə qazandı! Bu kollektiv İngiltərə futbolunun ən yüksək liqasında sonuncu dəfə 1947-ci ildə oynamışdı. Amma Ankersen 2021-in dekabrında ''Brentford''dan ayrıldı. Çünki bu ilin əvvəllərində ''Sport Republic'' 100 milyon funt sterlinq qarşılığında premyer-liqanın digər klubu ''Sauthempton''un səhmlər paketinin 80 faizini ələ keçirdi! Qısası, ''Göztəpə'' yetərincə etibarlı əllərə keçir.