Belarus millisinin üzvü Danila Neçayev Azərbaycan komandasına qarşı dünən keçirilən Millətlər Liqasının oyunu ilə bağlı fikirlərini bildirib.

"Football-plus.az" xəbər verir ki, 22 yaşlı futbolçu federasiyanın rəsmi saytına müsahibə verib:

- Qarşılaşma haqda fikirlərini bilmək maraqlı olardı...
- Oyunla bağlı fərqli fikirlərim var. Matç istəyimiz kimi alınmadı. Baxmayaraq ki, bizdən tələb olunanı gerçəkləşdirməyə çalışdıq. Müsbət məqam odu ki, qapımızı toxunulmaz saxlaya bildik. Mənfi tərəf isə qol vurub qələbə qazana bilməməyimiz oldu.

- Rəqib siz nə iləsə təəccübləndirə bildi?
- Xeyr, təəccübləndirmədi. Biz onları yaxşı öyrənmişdik və belə oyuna hazır idik. Xüsusi heç nə görmədik. Amma rəqib yaxşı komandadı, heyətində texnikalı oyunçular var.

- Düşünmürsən ki, görüşdə kifayət qədər qayda pozuntuları oldu?
- Qələbə qazanmaq istəyirsənsə, o zaman qorxmamalı və mübarizəyə girməkdən çəkinməməlisən. Bu, təəccüblü deyil.

- Öz oyunundan razı qaldın?
- Qalib gəlsəydik, razı qalardım. Amma heç-heçə qanəedicidi.

- Qazaxıstanın səfərdə Slovakiyanı məğlub etməsi sizi təəccübləndirmədi ki?
- Təəccübləndirmədi. Biz də Slovakiyaya qarşı pis oynamadıq. Qalib gələ bilərdik.

- İki oyuna bir xal toplamaq sizi məyus edir?
- Hə. Biz çalışırıq. Biz insanıq, robot deyilik. Qol imkanlarımız çox olmur. Amma gerçəkləşdirə bilmirik. Gərək özümüzü toparlayıb aqressiv olaq.