Ötən günlərdə AFFA İcraiyyə Komitəsinin qərarı ilə gələn mövsüm üçün premyer-liqada legioner limitində dəyişiklik edildi.

"Football-plus.az" xəbər verir ki, çempionatda "7+4" formatı istifadə olunacaq. Görəsən, bu, ölkə futboluna xeyir verəcək? Məsələ ilə bağlı fikirlərini bildirməsi üçün “Neftçi”nin baş məşqçisi Samir Abasovla əlaqə saxladıq. Təcrübəli mütəxəssis verilən qərarın doğru olduğunu dilə gətirdi:

“Mən 3 ay əvvəl deyəndə ki, legioner və 21 yaş limiti ləğv olunmalıdı, çoxları üzərimə hücum çəkərək "Samir Abasov ancaq özünü düşünür, Azərbaycan millisinin və futbolumuzun gələcəyi onun vecinə deyil" kimi təzyiqlər etdi. Hətta bəzi jurnalistlər məni futbolumuz üçün "arzuolunmaz şəxs" elan etdi. Mən həmişə futbolumuzun inkişafında maraqlı olmuşam. Bir çox aparıcı ölkələrin çempionatlarında legioner limiti yoxdu. Ona görə həm çempionatları, həm də yığmaları güclüdü. Uzağa getməyərək, Moldova ilə Gürcüstanı götürək. Onlarda da legioner limiti yoxdu. Amma bu gün Moldova ilə Gürcüstan milliləri yığmamızdan üstündü, onların futbolçuları Avropanın fərqli çempionatlarında top qovur. "Şerif" nəhəng "Real"ı məğlub edir. Mənə görə çempionatımızda, ümumiyyətlə, limit olmamalıdı. Amma eyni zamanda anlayıram ki, bunu birbaşa həyata keçirmək çox çətindi. Başlanğıc üçün “7+4” formatı yaxşıdı. Gələcəkdə limiti tədricən artırıb sonra ləğv etmək məqsədəuyğundu. Çoxları legioner limitinin artırılmasından bərk qorxur. İnanın ki, burda qorxulu heç nə yoxdu. Ölkəmizə nə qədər səviyyəli legionerlər gələcəksə, həm çempionatımız, həm də yerli futbolçularımız inkişaf edəcək. Baxın, Roman Qriqorçukun vaxtında "Qəbələ"yə səviyyəli legionerlər transfer olundu, illər sonra komandada Urfan Abbasov, Qismət Alıyev, Amin Seydiyev kimi futbolçular yetişdi. Həmçinin "Qarabağ"da Çumbinyo, Leroy Corc, Reynaldo kimi futbolçuların çıxışı nəticəsində yerli futbolçular daha da inkişaf etdi. Son illərdə komandada İsmayıl İbrahimli, Toral Bayramov, Musa Qurbanlı kimi gənclər parladı. Gənc futbolçu limiti də çoxdan götürülməliydi. Bunun mövcudluğu gənclərin inkişafı əvəzinə tənəzzülünə xidmət edir. Perspektivli gənc futbolçu varsa, potensialını açmaq üçün gecə-gündüz tər tökəcək və şans qazanacaq. Məgər gənc yaşlarında parlayan Zaur Tağızadəni limit üzə çıxardı? Mən baş məşqçi olduğum bütün komandalarda həmişə perspektivli gənclərə şans vermişəm. Bundan sonra da o ənənəyə sadiq qalacam. Yola saldığımız mövsümə nəzər yetirsəz, görərsiz ki, ən çox gənc futbolçulara şans verən komandalardan biri "Neftçi"di. Gənclər limitə arxayın olmayıb, özünü sübut etmək üçün alışıb-yanmalı, tər tökməlidi”.

ABDULLA İSMAYILOĞLU