AKAF-ın böyük planları var
Dünən Azərbaycan Kanoe və Avarçəkmə Federasiyanın (AKAF) hesabat xarakterli açıq mətbuat konfransı keçirildi.
Tədbirdə federasiyanın vitse-prezidenti Fərid Əmirov, baş katib Fərhad Əliyev, Gənclər və İdman Nazirliyinin İdman şöbəsinin müdiri Elnur Məmmədov iştirak etdi.
İştirakçıları salamlayan Fərid Əmirov əsas məqsədlərinin bu idman növünü inkişaf etdirmək olduğunu söylədi: "Mütəxəssislərin fikrincə, Xəzərdə dəniz avarçəkməsini inkişaf etdirmək olar. Dəniz avarçəkməsində dalğa da ola bilər. Amma Bakı ilə bu işi bitirmək istəmirik. Regionlarda gənclərlə görüşəcəyik. Bölgələrimizdə göllər var. Artıq cari il bu işə start veriləcək".
Fərhad Əliyev isə dəniz avarçəkməsində yeni mövsümə legionersiz başlamağın çətin olacağını dedi: "Çağırılacaq legioner tanınmış olacaq və bizə köməyi dəyəcək. Milli komandanın heyətində həm yerlilər, həm də legionerlər məşq edir. Onlardan ən hazırlıqlı olanlar Paris Olimpiadasına lisenziya xarakterli yarışlara yollanacaq. Xəzər dənizində avarçəkmənin bu növü ilə bağlı bir neçə yerə baxılıb. Dövlət Bayrağı Meydanı tərəfdə işlər görüləcək". Elnur Məmmədov Suqovuşanda ilk dəfə beynəlxalq yarışın təşkil olunduğunu xatırladaraq, bu idman növünü inkişaf etdirməyin daha çətin olduğunu bildirdi. Hər şeyin infrastrukdurdan asılı olduğunu, nazirliyin federasiyaya lazımi dəstək verəcəyini də diqqətə çatdırdı".
Daha sonra federasiyanın akaf.az adlı yeni saytı təqdim olundu. Saytda avarçəkmə ilə bağlı müxtəlif məlumatlar yerləşdirilib. Eyni zamanda bu idman növünə maraq göstərən uşaq və gənclərin inkişafı üçün "bizə qoşul" bölməsi var. Həvəskarlar federasiyanın rəsmi saytında qeydiyyatdan keçərək peşəkar və ya həvəskar şəkildə avarçəkmə ilə məşğul ola bilər. Sonda isə bulvardakı "Kiçik Venesiya şəhərciyi"ndə avarcəkmə qayıqları nümayiş olundu. Bunda məqsəd Bakıda yaşayan uşaqlar və yeniyetmələr arasında avarçəkməyə marağı daha da artırmaq, eyni zamanda onları bu idman növünə cəlb etməkdi.
ŞAİR ABDULLA
