“Komandanın bərpası üçün atılan ilk addımlardır. “Araz” 55 il əvvəl yaranıb. Üç dəfə Azərbaycan çempionatında gücümüzü sınamışıq. 7-8 il əvvəl çempionatdan kənarda qaldıq. İndi “Araz Naxçıvan” yenidən bərpa olunub və inanıram ki, çempionatda öz sözümüzü deyəcəyik”.
"Football-plus.az" xəbər verir ki, bunu “Araz Naxçıvan”ın idarə heyətinin üzvü Tahir Əliyev deyib.
Klub rəsmisi növbəti mövsümdən 1-ci ivizionda mübarizə aparmalarına münasibət bildirib:
“Araz Naxçıvan”ın elə strukturu qurulur ki, həm təşkilati, həm baza, həm meydançalar baxımından işlər bundan sonra da davam edəcək. Biz özümüzü gediləsi uzun yolda hiss edəcəyik. Qısa yol olmayacaq. Hədəflərimiz böyükdü. Bu il birinci divizionu düşünürüksə, sonra premyer-liqanı düşünürük. Bizim üçün şərait yaradılıb”.
O, “SSRİ dönəmində “Araz Naxçıvan”ın rəngi mavi olubsa, indi niyə ağ-qırmızıdı”, - sualını da cavablandırıb:
“Əslində, ağ-qırmızı yox, qırmızıdı. Müəllifi də mənəm. Məşhur kosmonavt Aleksey Leonov, açıq kosmosa çıxan ilk insandı. Onun kitabı var, orda yazır ki, yer kürəsini yuxarıdan qırmızı rəngdə gördüm. Yerə enəndən sonra bir çox ölkələri gəzib, həmin rəngi axtardım. Leonov 70-ci illərin sonunda Naxçıvanda olub. Deyib ki, ilk dəfə həmin rəngi Naxçıvan dağlarında görmüşəm. Elə mən də Naxçıvan dağlarının şərəfinə o rəngin götürülməsini təklif etmişəm, razılıq alınıb”.
RƏŞAD