''Real'' finalda ''Liverpul''u yenərək tarixinin 14-cü Çempionlar Liqası titulunu qazandıqdan sonra klubun rəsmi ''tvitter'' səhifəsi bir çox paylaşımlar etdi.

Bunlardan biri ''biz finalları oynamırıq, biz finalları qazanırıq'' şəklində oldu. Bu tvit ''Qalatasaray''ın diqqətini cəlb etdi və İstanbul nəhəngi Madrid nəhənginə cavab vermək qərarına gəldi. Qardaş ölkənin təmsilçisi buna cavab olaraq 2000-ci ildə Avropa Superkuboku uğrunda matçdan çəkilmiş bir şəkil paylaşdı və ''təbriklər, amma əminsizmi?'' ifadəsini yazdı. ''Sarı-qırmızılar''ın bu tviti fanatlar arasında böyük maraqla qarşılandı. Xatırladaq ki, 2000-ci ildə UEFA Kubokunu qazanmaqla Avropa Superkuboku uğrunda görüşdə iştirak etməyə haqq qazanan ''Qalatasaray'' Monakoda keçirilən oyunda ''Real''ı Jardelin dublu sayəsində 2:1 hesabı ilə məğlub etmişdi.

ƏLİ RAUFOĞLU