“Yalnız mən və Trapattoni beş dəfə avrokubok qazanmışıq” - Mourinyo
“Roma”nın baş məşqçisi Joze Mourinyo “Feyenoord”a 1:0 hesabıyla qalib gəldikləri Konfrans Liqasının final oyunundan sonra maraqlı açıqlama verib: “A seriyasında “Torino”nu 3:0 hesabıyla məğlub etdiyimiz oyundan sonra paltardəyişmə otağında oğlanlara dedim ki, üzərimizə düşəni etdik: Avropa Liqasına vəsiqə qazandıq. Və biz bu gün meydana iş üçün yox, tarix yazmağa çıxdıq. Biz bunu bacardıq. Lap əvvəldən Konfrans Liqasında uğur qazanacağımızı hiss edirdik. Matçlar getdikcə çətinləşdi, “Marsel” və “Feyenoord” kimi güclü komandalar da qələbəyə iddialıydılar. Amma biz bütün diqqətimizi kuboka yönəltmişdik və bu, ölkə çempionatında komandamıza çoxlu xal itkisi bahasına başa gəldi. Qalib olmaq asan deyil. Bunun üçün müxtəlif inqrediyentlər lazımdı. Komandamız mövsüm ərzində 55 oyun keçirib, finala çox yorğun halda çıxmışdıq. Amma bunu büruzə verməməyə çalışırdıq və heç nəyə baxmayaraq, mübarizə apardıq. Valehedici kollektivə malikik. Uşaqlarla fəxr edirəm. İkinci hissədə işimiz çətin oldu, rəqib çox yaxşı oynadı və bizi müdafiə xəttini yenidən qurmağa vadar etdi. Finalda oynamaq tarixə düşmək üçün azdı. Matçdan əvvəl oyunçulara uduzduğum finallar haqda danışmışdım. Onlar bütün gücünü meydanda qoydular və biz qalib gəldik. İndi özümü əsl romalı kimi hiss edirəm. “Roma”da qalıram, nə desələr də, buna şübhə yoxdu. Mən “Roma”dakı işimi davam etdirmək istəyirəm. Klubun əla və vicdanlı sahibləri var. Biz bu layihə üzərində işi davam etdirməli və növbəti mövsüm üçün inkişaf planını müəyyənləşdirməliyik. Bütün beynəlxalq kuboklar vacibdi. Yalnız mən və Trapattoni beş dəfə avrokubok qazanmışıq. Özümü qocalmış hiss edirəm. Mən 2003, 2015 və ya 2016-cı ildə (əslində 2017-ci ildə - red.) qalib gəlmişdim, indi isə 2022-ci ildə uğur qazandım. İndi qələbədən və çimərliyimdə tətildən ləzzət alacağam”.
Digər xəbərlər
