Bir “futbol ili”nin də sonuna gəlirik.

Mövsüm ərzində çoxlu yaddaqalan hadisə, oyun və oyunçu oldu. Onlardan biri də “Football-plus.az"”ın ümummilli sorğusuna əsasən “ilin futbolçusu” seçilən Emin Mahmudovdu. “Neftçi”nin kapitanı ötən mövsüm ölkə çempionluğunu qazansa da, bu ili titulsuz başa vurmalı olacaq. Millinin də əsas üzvlərindən olan yarımmüdafiəçi ilə əlaqə saxlayıb, bizi maraqlandıran suallara cavab tapmağı lazım bildik. Təəssüf ki, Mahmudov qısa cavablarla kifayətləndi.

- Ötən mövsüm çempion olsaz da, cari “futbol ili”ndə uğurun davamını gətirə bilmədiz. Nəticə etibari ilə “Neftçi” titulsuz qaldı. Buna səbəb nə oldu?

- Çox səbəb göstərmək mümkündü. Komandamızın əsas oyunçularının getməsi və yeni transferlərin tam uyğuşlaması üçün vaxtın lazım olması təsir göstərdi. Amma “Qarabağ”ın bu il çox güclü olması ən birinci səbəbdi.

- Mövsüm ərzində bir çox oyunda azarkeşlər baş məşqçi Samir Abasovun istefasını tələb etdi. Bu haqda nə düşünürsən? Mütəxəssis getməlidi, yoxsa onunla çalışmaqdan razısız?

- Samir Abasovun rəhbərliyi altında çempion olmuşam və karyeramda ən yaxşı mövsümlərdən birini keçirmişəm. Bu mütəxəssislə çalışmaq mənim üçün xoşdu. Komandada qalmasını istəyirəm.

- Millidə uğurlu çıxışla fərqləndin, qollar vurdun. Lakin “Neftçi”də cari mövsüm daha az diqqət mərkəzində oldun. Samir Abasov da bunu mətbuat konfranslarında qeyd etdi. Səbəbi nədi? Üzərində yorğunluq hiss edirsən?

- Bəzi oyunlarda yorgun olduğum düzdü. Amma bu əsas səbəb deyil. Fürsətlərdən düzgün istifadə edə bilmədim. Bu səbəbdən də qollarım o qədər də çox olmadı. Yəqin buna görə diqqət mərkəzində az oldum.

- “Qarabağ” bu mövsüm ciddi çətinlik çəkmədən çempion oldu. Komandaların Ağdam təmsilçisi ilə başabaş mübarizə apara bilməməsinin səbəbini nədə görürsən?

- Bu mövsüm “Qarabağ” çox güclü idi. Bunun əksinə, biz zəiflədik. Ona görə də çox rahat çempion oldular.

- “Neftçi”nin heyəti və hazırkı durumu ilə bağlı nə deyə bilərsən? Bu komanda Konfrans Liqasının qrupuna vəsiqə qazana bilər?

- Fikrimcə, çox güclənməyimiz lazımdı. Bu vacibdi. Amma buna məşqçi korpusu və klub rəhbərliyi qərar verəcək.

- Bir kapitan kimi sənin fikrin necədi? Hansı mövqelər gücləndirilməlidi ki, komanda növbəti mövsümdə iddiasını tam ortaya qoysun.

- Buna dəqiq cavab verə bilmərəm. Rəhbərlik qərar verəcək.

- Sabah (bu gün) son turda Azərbaycan derbisi baş tutacaq. Sən isə bu matçda iştirak edə bilməyəcəksən. Bununla bağlı təəssüratını öyrənmək istərdik...

- Bu qarşılaşmada meydanda olmayacağım üçün çox təəssüflənirəm. “Qarabağ”la görüşləri çox sevirəm. Sözsüz, çempionatın ən maraqlı qarşılaşmasıdı. Amma təəssüf ki, meydanda ola bilməyəcəm. Həqiqətən buna görə pis oluram.

- Premyer-liqanın bürünc medalçısı da məlum olacaq. Bu mübarizədə “Zirə”ni, yoxsa “Qəbələ”ni şanslı görürsən?

- Həm “Zirə”, həm də “Qəbələ” bürünc medala layiqdi. Deyə bilmərəm ki, hansı daha şanslıdı. Hər ikisinə uğurlar arzulayıram.

- Ölkə kubokunun finalında “Qarabağ” “Zirə” ilə üz-üzə gələcək. Favoritin hansı komandadı? Kimin qalib olmasını istərdin?

- Əlbəttə, finalda aşkar favorit “Qarabağ”dı və hamı onların çempionluğunu gözləyir. Amma düşünürəm ki, “Zirə”nin də şansları olacaq. Epizdoları düzgün dəyərləndirsələr, qalib gələ bilərlər.

- Yeri gəlmişkən, mediada Samir Abasovla dava etdiyiniz haqda xəbər yayılıb. Doğrudu?

- Yalan məlumatdı. Hər kəs bilir ki, baş məşqçi ilə münasibətlərim çox yaxşıdı. Heç vaxt da problem yaşamamışıq. Ona görə də belə əsassız xəbərlərə reaksiya vermirəm.

- Qarşıdan Millətlər Liqası gəlir. AFFA komandanın qarşısına qrupdan çıxmaq vəzifəsi qoyub. Səncə, bu nə dərəcədə realdı?

- Sadəcə, bunu deyə bilərəm: əlimizdən gələni edəcəyik ki, hər şey yaxşı olsun.

SƏNƏM FƏRHADOVA