Avropa çempionatının seçmə mərhələsinə hazırlığı davam etdirən 22 yaşadək oğlan voleybolçulardan ibarət Azərbaycan milli komandası Bakıdakı təlim-məşq toplanışını başa vurub.

"Football-plua.az" xəbər verir ki, Eldar Əliyevin rəhbərlik etdiyi yığma bu gün Türkiyəyə yola düşüb. Komanda məşqlərin son mərhələsini bu ölkədə keçəcək.

Yığmamız qonşu ölkədə yoxlama matçında da qüvvəsini sınayacaq. Voleybolçularımız Ankarada hazırlıq çərçivəsində türkiyəli həmyaşıdları ilə də üz-üzə gələcək.

Komandamız Avropa çempionatının 2-ci təsnifat mərhələsinə ev sahibliyi edəcək Kosovoya isə mayın 19-da Türkiyədən yollanacaq.

Avropa çempionatında komandamızın heyətində Nikulenko Yegor, Rzazadə Mirəşrəf, Jenkel Ferhat, Verdizadə Mais, Qurski Roman, Məmmədov Mərdan, Həmidov Aslan, Bünyatov Yusif, Aşumov Emil, Əmirxanlı Emin, Ablou Amirmehdi və Həsənli Kənan çıxış edəcəklər. Milli komandamıza Eldar Əliyev rəhbərlik edəcək, Akif Vəliyev, Fərid Cəlalov və Ruslan Motorin isə köməklik edəcəklər.

Millimiz E qrupunda Kosovo, Niderland və Slovakiya ilə birgə gücünü yoxlayacaq. Komandamızın ilk matçı mayın 20-də start götürəcək. Təsnifat mərhələsində 21 komanda 6 qrupda qüvvəsini sınayacaq. Qrup qalibləri və ən yaxşı ikinci yerin sahibi final mərhələsinə vəsiqə qazanacaq.

AVRO-2022, Təsnifat mərhələsi
E qrupu

20 may
21.00. Azərbaycan – Kosovo

21 may
21.00. Niderland – Azərbaycan

22 may
21.00. Slovakiya – Azərbaycan