Şumaher Mayamidə çimərliyə qaçacaq.

“Formula-1” üzrə dünya çempionatında ilk dörd mərhələ arxada qalsa da, Mik Şumaher 1 xal da toplamayıb. “Haas”ın pilotu komandanın mətbuat xidmətinə verdiyi müsahibədə mayın 8-də keçiriləcək Mayami “Qran-pri”si ilə bağlı gözləntilərini bölüşüb.

- Mayami mərhələsindən nə gözləyirsiz?

- Əvvəllər Mayamidə olmamışam, yalnız bir dəfə bu şəhərdən keçib getmişəm. Sevinirəm, axı həmişə Mayamiyə baş çəkmək istəmişəm. Burdakı çimərliklər bütün dünyada məşhurdu, qalacağım otel sahil xəttinin yaxınlığındadı, bu üzdən çimərliyə qaçacam. Əlbəttə, hər şeydən daha çox yarışı gözləyirəm.

- Mayami trassı, burdakı ötmə imkanları haqda danışa bilərsiz?

- Hələ ki trassda maşın sürməmişəm, bu üzdən onun nəyə bənzədiyini demək çətindi, ancaq ABŞ-da mərhələlər həmişə şən keçir. Təşkilatçılar həmişə maraqlı şou qururlar, adətən, görüşmək imkanının olmadığı məşhurları dəvət edirlər, teletranslyasiya parlaq alınır. “Formula-1”in get-gedə hansısa mənada daha çox “amerikalaşması” yaxşıdı. ABŞ-da gözəl azarkeşlər var, bu ölkəyə hər səfərimdə məmnunluq duyuram.

- ABŞ-ı bəyənməyiniz heç kimə sirr deyil. Gələn mövsüm bu ölkədə üç mərhələ baş tutacaq. Sizi belə çox cəlb edən nədi?

- ABŞ-ı əsasən ona görə bəyənirəm ki, bu ölkə başqalarına oxşamır. Deməzdim ki, yalnız ABŞ-ı bəyənirəm. Məsələn, Avstraliya da xoşuma gəlir, Norveçin şimalındakı dağlar və ya İsveçrə də ürəyimcədi, ancaq Amerika... Bacım deyir ki, ABŞ-da səma adama daha böyük görünür, hansısa mənada elə belədi! Adamlar çox xoşniyyətlidi – ötən il məni polis saxladı, o qədər mehriban idi ki, hətta patrul maşınına baxmağa da icazə verdi.

- Bu mövsümün ilk beş mərhələsi dünyanın müxtəlif ölkələrinə salınıb. Gücünüzü və konsentrasiyanızı necə qoruyursuz?

- Adətən, yarışacağım yerlərə erkən yollanıram ki, orda daha çox vaxt keçirim. Avstraliyaya bir həftə əvvəl uçmuşdum, Mayami ilə bağlı da belədi. Yarış yerinə tez yollanmaq ritmi tutmaq baxımından da önəmlidi. Yarışdan dərhal sonra evə uçacam ki, Avropanın saat qurşağına tez öyrəşim. Axı irəlidə bizi Avropa mərhələləri gözləyir. Adətən, trenajor zallarının olduğu yerlərə yaxın qalıram. Məsələn, Texas kimi şəhərlərdə olanda bütün günüm ayaqüstə keçir, yox, zalda məşğul olmaq imkanı tapıramsa, bu artıq mənim üçün bonusdu.