Bildiyimiz kimi AFFA-nın Lisenziya Komissiyasının iclası keçirilib.

İclasda Azərbaycan premyer-liqasında iştirak etmək üçün müraciət edən klubların sənədlərinə baxılıb. 2 komandaya premyer-liqada çıxış etmək hüququ verilib. Bunlar "Turan Tovuz" və "Kəpəz"di. 1-ci divizionda çıxış edən "Zaqatala"da premyer-liqada iştirak etmək niyyətində idi. Bəs, görəsən, buna maneə olan nə oldu? Bu qərardan sonra komandanın ab-havası necədi? Sualımızı Zaqatala təmsilçisinin baş məşqçisi Rüstəm Məmmədova ünvanladıq:

"Ümumiyyətlə, açıq bilmirəm ki nə məsələ oldu. AFFA-nın Lisenziyalaşdırma Qrupundan gəlib hər il necə bu ildə elə görüşlər oldu. Problem nədə oldu onu bilmirəm. Bu proseslə rəhbərlik məşğul olur. Məşqçi kimi məndə istəyirdim ki, işlərimiz daha yaxşı getsin, komanda premyer-liqada iştirak eləsin. Biz neçə ildi bunu istəyirik. Hətta 1-ci divizonda yüksək yerlərdə tutmuşuq. Keçən il də bizim haqqımız idi. Divizion komandaları arasında 1-ci yeri tutmuşduq. Bu olanlar təbii ki, komandanın ab-havasına təsir elədi. Amma bu bizim işimizə maneə olmayacaq. Dünyanın sonu deyil. Hazırlaşıb daha da iddialı olmalıyıq. Mən həmişə deyirəm ki, öncə yer tutmalısan sonra haqqını tələb etməlisən. Bu gün biz 8-9-cu yerlərdə gediriksə mən hansı haqq, ədalətdən danışa bilərəm? "Qaradağ Lökbatan" var hansı ki, çempion oldular. Onlar irad bildirə bilər. Bizdən öndə olan MOİK buna irad bildirə bilər. "Kəpəz" isə bizdən sadəcə 2 xal öndədi. Hələ çempionatın sonuna iki tur qalıb. Yer tutmadığımız üçün irad bildirə bilmirəm. Futboldu bu. Bu il alınmadı, gələn il alınar. İşimizi görürük, buna da davam edirik".

GÜNAY VƏLİYEVA