Millimizin sabiq futbolçusu Ramal Hüseynova verilən cəza ilə bağlı “Səbail” AFFA-ya müraciət etmişdi. Dünən müraciətə baxan Apellyasiya Arbitraj Tribunalı isə şikayəti təmin etməyib.

Görəsən, Hüseynovun buna münasibəti necədi? Ramal Hüseynovun “Football-plus.az” saytına açıqlaması belə oldu:

“Artıq qərarı veriblər. Heç nə demirəm, nə istəyirlər, etsinlər. Vurmamışam, təhqir etməmişəm. İstədiklərini danışırlar. Əsas odu, hakimə şiddət göstərməmişəm, üstünə getməmişəm. Hakimi vuranlara 1 il, mənə heç nə etmədən 2 il cəza verirlər. Futbolda canımı qoymuşam, amma mənə qarşı etdiklərinə baxın. Şükür Allaha, məni Azərbaycan tanıyır. Futbolumuzu ölkədən xaricdə tanıtmışam. Məndən başqa Azərbaycanda hansı futbolçu UEFA-nın prezidenti ilə onun dəvətinə əsasən görüşüb? 2000-ci ildə Avropanın 7 ən böyük transferi sırasında kim yer almışdı? Bunların hamısını mən gerçəkləşdirmişəm. İndi belə bir futbolçunu Azərbaycan futbolundan 2 il uzaqlaşdırırlar. Bu nə dərəcədə düzgündü? Bunu özləri də çox yaxşı bilir. Belə çıxır, futbolu bilən futbol adamını bu idmandan uzaqlaşdırmaq lazımdı? Həm də kimə görə? Belə başa düşürəm ki, bu qərarı verənlər məni tanımır, futbolu da bilmir”.

Maraqlıdı, vaxtilə “Qarabağ”, “Bakı” və “Neftçi” kimi klubların formasını geyinən Ramal 2 il ərzində futboldan kənarda nə işlə məşğul olacaq:

“Təhsilimi də atıb özümü futbola verdim. Mənə İsveç vətəndaşlığı təklif edirdilər ki, burda yaşa. Özümü fikirləşsəydim, bu təklifi qəbul edib orda yaşaya bilərdim. Amma getmədim. Bütün bunları Azərbaycan futbolu üçün etdim, özüm üçün yox. Azərbaycan mənim vətənimdi, canımdı. Futboldan başqa da işim yoxdu. Bundan da məni 2 il uzaqlaşdırdılar”.

ŞAİR ABDULLA