“Hakimlərlə yaşadığı problemlər həqiqətən bizi məyus edir” - AÇIQLAMA
Ötən həftə AFFA İntizam Komitəsi Gənclər Liqasında çıxış edən "Səbail"in məşqçisi Ramal Hüseynovu 2 il müddətinə futbolla bağlı istənilən fəalliyətlə məşğul olmaq hüququndan məhrum etdi.
Buna 38 yaşlı mütəxəssisin stadiona giriş qadağası olmasına baxmayaraq, "Qarabağ"la oyunda meydana çıxması və hakimlər briqadasını təhqir etməsi səbəb olub. Məşqçi daha əvvəl ROFM ilə matçda hakimi təhqir etdiyinə və hədə-qorxu gəldiyinə görə 15 matçlıq cəza almışdı.
Görəsən, “Səbail”in çalışdırıcısı cəzalı olduğu halda nə üçün görüşü izləməyə gedib? Hüseynov hansı səbəbdən yenə hakimi təhqir edib? Yaşananlarla bağlı fikirlərini öyrənmək üçün məşqçinin özü ilə əlaqə saxlamaq istəsək də, cəhdlərimiz boşa getdi. Bu səbəbdən də klubun icraçı direktoru Fərəc Əliyevə müraciət etdik:
“Əvvəlcə onu bildirim ki, başverənlərə görə təəssüf hissi keçirirəm. “Səbail” 2016-cı ildən fəalliyyət göstərir. Bizim klubda heç vaxt belə şey olmayıb. Divizionda çıxış edərkən də başqalarına örnək olmuşuq. Mən hadisə baş verən gün akademiyanın əlaqələndiricisi ilə görüşdüm. Ramal Hüseynov, sadəcə, hakimin qərarı ilə razılaşmayıb. Biz bilirdik ki, məşqçi cəzalanacaq. Amma İntizam Komitəsinin belə qərar verəcəyini gözləmirdik. 2 illik futboldan kənarlaşdırıldığı üçün klubla müqaviləsinə avtomatik xitam verildi. Buna görə məyusuq. Ramal Hüseynov yaxşı insandı. Məşqlərdə özünü çox yaxşı aparıb. Heç bir valideyn və ya uşaq ondan şikayətçi olmayıb. Yəni problem yaradan şəxs deyil. Sadəcə, hakimlərlə yaşadığı problemlər həqiqətən bizi məyus edir”
Premyer-liqanın 22-ci turunda “Səbail” “Qəbələ”ni 3:0 hesabı ilə məğlub etdi. Bu, “dənizçilər”in 2022-ci ildə ilk qələbəsi idi. Fərəc bəy komandanın qələbəsinə görə xoşbəxt olduğunu dilə gətirdi:
“Açığı, belə gözəl oyunla qələbə qazanacağımızı gözləmirdik. Bundan sonra da yaxşı oynamağa davam edəcəyik. Sponsor şirkətin rəhbərliyindən də nümayəndə oyunu izləyirdi. Bilirsiz, futbolçu biləndə ki, klub rəsmisi matça baxmağa gəlib, özünü daha motivasiyalı hiss edir. Söhbət puldan getmir. Belə olanda futbolçular mənəvi dəstək hiss edir. Həqiqətən möhtəşəm oyun sərgiləyib, qələbə qazandıq. Buna görə xoşbəxtik. Komandanın üzvlərini təbrik edirəm. Ümid edirəm ki, qələbənin davamı gələcək”.
İLKİN SULTANLI
