Ceyms Milner böyük ehtimalla gələn mövsümdə də “Liverpul”da oynayacaq.

Rəhbərlik baş məşqçi Yürgen Kloppun istəyi ilə 36 yaşlı yarımmüdafiəçiyə birillik yeni müqavilə təklif edib. Yerli mənbələr tərəflərin anlaşmaya yaxın olduqlarını xəbər verir. Milnerin mövcud müqaviləsinin müddəti mövsümün sonunda başa çatacaq.

Məhəmməd Salahın gələcəyi isə hələ də qeyri-müəyyən olaraq qalır. O, rəhbərliyə yeni müqavilə imzalamaq istədiyini bildirməyib. Misirli futbolçu karyerasını İspaniyada və ya Fransada davam etdirmək imkanlarını götür-qoy edir. 29 yaşlı hücumçunun klubla hazırkı müqaviləsinin müddəti 2023-cü ilin yayına qədər nəzərdə tutulub.

“The Telegraph” qəzeti Salahın tezliklə yeni təklifi müsbət cavablamayacağı halda yayda transferə çıxarılacağını iddia edir. Ona görə ki, rəhbərlik Məhəmmədlə bir ildən sonra havayı vidalaşmaq istəmir.