“Veqas” tarixində ilk dəfə pley-offdan kənarda qaldı
MHL-də pley-offa vəsiqə qazanan 16-cı komanda srağagün müəyyənləşdi.
Əvvəlki sayımızda “Veqas”la “Dallas”ın sonuncu vəsiqə uğrunda mübarizə apardığını xəbər vermişdik. “Çikaqo”ya bullit seriyasında uduzan “Veqas” bu şansı itirdi və tarixində ilk dəfə Stenli kuboku uğrunda oynamayacaq. 92 xalla Qərb konfransının turnir cədvəlində 9-cu pillədə qərarlaşan komandanın 2017/18 mövsümündən bəri MHL-də çıxış etdiyini də xatırladaq.
Düzdü, “Dallas” da “Arizona”ya overtaymda uduzdu. Ancaq bu 1 xal “Starz”a pley-offa adlamağa kifayət etdi. Pley-offun ilk mərhələsinin cütləri artıq bəllidi.
Şərq konfransı:
“Florida” – “Vaşinqton”
“Karolina” – “Boston”
“Reyncers” – “Pittsburq”
“Toronto” – “Tampa-Bey”
Qərb konfransı:
“Kolorado” – “Neşvill”
“Kalqari” – “Dallas”
“Minnesota” – “Sent-Luis”
“Edmonton” – “Los-Anceles”
Bu arada “Pittsburq”un prezidenti Devid Morhauz son 16 ildə tutduğu postu tərk edib: “Pittsburq”un gələcəyinin etibarlı əllərdə olduğuna əminəm. Klubun yeni sahibi “Fenway Sports Group”un rəhbərliyi qələbəni əsas götürür ki, bu da həmişə “Pittsburq”un fəlsəfəsi olub. Onların uğurlu klub idarəçiliyi təcrübəsi var, bizdə isə idmandakı ən yaxşı personallardan biri cəmləşib”.
“Fenway Sports Group”un “Pittsburq”un səhmlərinə nəzarət paketini ələ keçirməsi ilə bağlı razılıq ötən ilin sonunda əldə olunub. KİV sövdələşmənin dəyərini 900 milyon dollar olduğu haqda xəbər yayıb.
Digər xəbərlər
