Qəzetimizin ötən saylarından birində boks üzrə ağır çəkidə sabiq mütləq dünya çempionu Mayk Taysonun yaşadığı qalmaqalla bağlı xəbər vermişdik.

Xatırladaq ki, San-Fransiskodan Floridaya uçmağa hazırlaşan əfsanəvi boksçu təyyarənin salonunda onu təxribata çəkən gənci yumruqlamış, işə polis qarışmışdı. Şahidlərin sözlərinə görə, Taysondan arxa oturacaqda əyləşən şəxs sərxoş vəziyyətdə olub və dəfələrlə onu təxribata çəkib.

Artıq həmin şəxsin ad-soyadı açıqlanıb. Melvin Taunsend polislə ünsiyyət baxımından “zəngin təcrübəyə malikdi”. Onu fırıldaqçılığa, maşın qaçırmağa, qarətə, oğurlanmış avtomobildə hərəkətə görə dəfələrlə saxlayıblar, üzərində yasaq narkotik maddələr tapılıb. Bu üzdən Melvin iki dəfə - 20 və 15 aylıq həbsdə yatmalı olub. Çox güman, 3-cü həbsdən də qurtula bilməyəcək.