AFFA futbol ictimaiyyətini aldatmaq üçün dəridən-qabıqdan çıxır.

Bütün vasitələri sınayıblar. O qədər yalan danışıblar ki, artıq onların yalanlarına inan da yoxdu. Belədə özlərini gülünc vəziyyətə salırlar. “Boz bina”da oturan ağıl-fikir sahiblərinin son “layihələrindən” biri də budu ki, Futbolun İnkişafı Fondu adlı qurum yaratsınlar. Guya bölgə klublarına dəstəyi artırmaq üçün yerli iş adamlarını futbola cəlb edəcəklər. Bu fondun başında dayanan kimdi? Elxan Məmmədovun gənc kadrlarından sayılan Tural Piriyev. Cənab Piriyev illərdi Məmmədovun komandasının əsas heyət üzvlərindən biridi. Onun sözünə inanıb, hansı iş adamı bu fonda pul verəcək? Fondun üzvlərindən biri tovuzlu millət vəkili Qənirə Paşayevadı. Yaxşı yadımdadı, “Turan” birinci divizionun qalibi olanda Qənirə xanım xeyli fəallaşmışdı. Əyninə komandanın formasını geyib, azarkeşlərin önündə çıxış edirdi. Tovuzlu azarkeşlərdə də ümid yaranmışdı ki, sevimli komandaları elitaya yüksələcək və illər sonra onlar da premyer-liqa oyunlarında “Turan”a dəstək verəcəklər. Sonrası nə oldu? Heç nə. Qənirə xanımın cəhdləri uğursuzluqla nəticələndi. AFFA “Turan”ı ələbaxan kluba çevirib, özü üçün təbliğat vasitəsi kimi istifadə etməyə başladı. O vaxtdan bəri nə dəyişib? Həmin vaxt Qənirə Paşayevanın sözü ilə “Turan”a pul ayırmayanlar indi ayıracaq? Özü də başında AFFA-nın kadrı dayanan, üzvləri də assosiasiya tərəfindən təyin olunan bir fondun çağırışı ilə? Etməyəcəklər, cənablar. Bunu AFFA-da oturanlar da, fondun üzvləri də gözəl bilir. Adamların etdikləri görüntü xatirinə iş görməkdi. AFFA bu layihəsində səmimi olsaydı, fondu ictimaiyyət üçün açıq edər, ora öz adamlarını yerləşdirməzdi.

Fəxrəddin Manafovun istedadlı, tanınmış aktyor olmasına şübhəm yoxdu. Amma Fəxrəddin bəy özü də bilir ki, onun sözüylə heç kim cibindəki beş manatı gətirib AFFA-nın yaratdığı fonda verməyəcək. Heç inanmıram ki, onun özü də belə gülməli cəhdlərə əl atsın, kimdənsə Azərbaycan futbolu üçün ianə rica etsin. Hardansa ona deyiblər ki, get, filan yerdəki toplantıya qatıl, adın hansısa fondun idarə heyətinin üzvü kimi çəkiləcək. O da razılıq verib. Necə ki, illər öncə “Neftçi”nin Müşahidə Şurasına xalq yazıçısı Çingiz Abdullayevi rəhbər təyin etmişdilər. O da öz sənətkar dostlarını rəhbərlik etdiyi şuraya doldururdu. Şən və hazırcavab oğlan Bəhram Bağırzadə həmin şuradan ilk imkandaca qaçdı, tezliklə də könlünü “Neftçi”nin əsas rəqibi “Qarabağ”a “qapdırdı”. Yəni səmimiyyət olmayan yerdə belə şeylərin baş verməsi də normaldı.

Söz Müşahidə Şurasından düşmüşkən, fondun icraçı direktoru Tural Piriyevin bu yaxınlarda verdiyi bir müsahibədə “şura” sözü diqqətimi çəkdi. Deyirdi ki, klublar üçün pul toplandıqdan sonra orda da Müşahidə Şurası yaradacaqlar. Səkkiz il əvvəl oxumağa başladıqları mahnıları təkrarlamaqdan yorulmayan adamlara ürəkdən gülmək istəyirəm. Kim zəmanət verə bilər ki, həmin o Müşahidə Şuralarına da AFFA öz “desantlar”ını yerləşdirib, bütün nəzarəti öz əlində saxlamağa çalışmayacaq? Elə bu səbəbdəndi ki, insanlar onların sözlərinə inanmır. Diqqət yetirin, Futbolun İnkişaf Fondu bir aydan çoxdu sosial şəbəkələrdə hesablar yaradıb. Hətta sponsorlu paylaşımlar edir, təbliğat maşınını işə salmağa çalışırlar. Amma xalqın gözü tərəzidi. Bu müddət ərzində Futbolun İnkişaf Fondunun “feysbuk”dakı səhifəsini 449 nəfər bəyənib. Paylaşımlarına da cəmi 30-40 nəfər reaksiya göstərir. Yəni öz ətraflarında olan dost-tanışlarının sayı qədər. Bu faktın özü Futbolun İnkişaf Fondunun ictimaiyyət arasında necə dəstək görəcəyinin, azarkeşlərin onların səmimiyyətinə hansı səviyyədə inanmasının göstəricisidi.

“Feysbuk”da “layk” yığa bilməyənlər real həyatda bir premyer-liqa klubunun saxlanılması üçün tələb olunan minimum iki milyonu necə yığacaqlar? Bu suala AFFA-dan cavab vermək istəyən tapılsa, biz də şad olardıq. Adamlar bölgə klublarının inkişafından, kənar sponsorların cəlb olunmasından danışarkən səmimi olsaydılar, illər öncə Nuru Əliyevi, Mübariz Mənsimovu futboldan iyrəndirməzdilər. Həmkarlarımız Rəsul Şükürsoyla Nail Nurəddinoğlu Lənkəranda klub yaradıb, azarkeşləri səhmdarlara çevirmək istəyəndə onların önündə min cür maneə yaradan kim idi? Təbii ki, AFFA. Səmimi olsaydılar, onlara badalaq vurmazdılar, əksinə, dəstək olardılar. AFFA bu istəyində səmimi olsaydı, dağdan ağır futbol adamı Nazim Süleymanovu futbolla bağlı fəaliyyətdən uzaqlaşdırmaz, elə bu fondun rəhbəri olmaq üçün işbirliyinə çağırardılar. Sponsorlar, azarkeşlər Süleymanova daha çox inanardılar, nəinki Tural Piriyevə və fonddakı başqalarına. AFFA-nın bu layihəsinin qeyri-səmimiliyini sübut etmək üçün nümunələrin sayını artıra da bilərəm. Amma bura qədəri də yetərlidi. Əminliklə deyə bilərəm ki, bu fond futbolun inkişafı yox, gözdən pərdə asmaq üçün yaradılıb.

AMAL