“Maliyyə cəlb olunması üçün beynəlxalq təşkilatlarla da əlaqədəyik” - AÇIQLAMA
AFFA-nın “Turan Tovuz”a 500 min manat ayrılması futbol ictimaiyyətində söz-söhbətə səbəb oldu.
Əksəriyyət belə az məbləğlə elitada çıxış etməyin qeyri-mümkünlüyünü qabartdı. Ancaq bir məsələ də var ki, bölgə təmsilçilərinin maliyyə durumunun yaxşılaşması üçün assosiasiya tərəfindən Futbolun İnkişaf Fondu (FİF) təsis olunub. Bununla bağlı AFFA İcraiyyə Komitəsi fevralda qərar qəbul edib.
Görəsən, FİF iki ay ərzində hansı işlər görüb? Qurum “Turan Tovuz”la “Kəpəz”in maliyyə problemlinin həlli istiqamətində hansı tədbirlər görməyi planlaşdırır? Bu və başqa qaranlıq məqamlara aydınlıq gətirmək üçün FİF-in rəhbəri Tural Piriyevlə əlaqə saxladıq: “Öncə fəaliyyətimizi diqqətdə saxladığınız üçün təşəkkür edirəm. Sizə son müsahibəmdə bildirdiyim kimi, FİF-in ilkin mərhələdə 5 regionda fəaliyyəti nəzərdə tutulub. AFFA-nın Lisenziya Komissiyasının mayın 6-da baş tutan iclasında alınan qərara əsasən “Turan Tovuz” və “Kəpəz” premyer-liqaya vəsiqə qazandı. Bununla da Tovuz və Gəncə regionları bizim üçün prioritetə çevrildi. Yaxın müddətdə fəaliyyətimizi əsasən bu bölgələr üzərində qurmuşuq. Qeyd edim ki, bu, digər regionların diqqətdən kənarda qalması demək deyil. Yeni mövsümün başlamasına qısa müddət qaldığına və hər iki klubun premyer-liqada iştirakı üçün maliyyə dəstəyi lazım olduğuna görə belə zərurət yaranıb. Hansı işlərin görülməsinə gəlincə, hər iki klubla bağlı sponsorluq təklifləri hazırlanıb və potensial tərəfdaşlara göndərilib. Həmçinin növbəti həftələrdə hər iki şəhərdən olan sahibkarlarla geniş görüş keçirilməsi planlaşdırılır. Bildiyiniz kimi, Futbolun İnkişaf Fondunun Himayəçilər Şurasınınn üzvü Qənirə Paşayeva Tovuzun millət vəkilidi. Həm Qənirə xanım, həm də bu şəhərlərdən olan digər millət vəkilləri ilə də sıx əlaqələrimiz var və onlar müvafiq dəstəklərini göstərirlər. Paralel olaraq, fərdi ianə portalı üzərində iş gedir. Portalın 2 aya fəaliyyətə başlamasını planlaşdırırıq. Portalın fəaliyyətə başlamasına yaxın onunla bağlı həm ətraflı məlumatı, həm də təbliğat işlərini genişləndirəcəyik. Bununla bağlı sorğu da keçirmişik. Sevindirici haldı ki, respondentlərin 86 faizi belə imkan yaradılarsa, dəstəklədikləri kluba ianə etmək istədiklərini bildiriblər. Sorğunun geniş hesabatı FİF-in sosial media hesablarında paylaşılacaq. Həm ianə portalı, həm də FİF-in fəaliyyəti ilə bağlı məlumatlılığı artırmaq üçün hər iki şəhərdə geniş tədbirlərin təşkili nəzərdə tutulub. Bunun üçün hər iki şəhərin İcra Hakimiyyətinə müraciət ünvanlamışıq. Onu da qeyd edim ki, maliyyə cəlb olunması üçün beynəlxalq təşkilatlarla da əlaqədəyik, belə imkanları davamlı araşdırırıq. Həmçinin yaxın vaxtlarda bir neçə layihəmizlə bağlı ictimaiyyətə məlumat verəcəyik”.
RƏŞAD
Digər xəbərlər
