Ötən həftə Qazaxıstan çempionatında çıxış edən “Turan”la yolları ayıran Vaqif Cavadov vətənə qayıtdı.

Onunla bağlı bugünlərdə bir iddia da ortaya atıldı. Deyilənlərə inansaq, guya Cavadov bir xanımdan külli miqdarda, yəni 142 min manat borc alaraq qaytarmayıb. Həm bu məsələyə aydınlıq gətirmək, həm də bizi maraqlandıran başqa suallara cavab tapmaq üçün onunla əlaqə əlaqə saxladıq.

- “Turan”da qısa müddət fəaliyyət göstərdiz. Baş məşqçi Vladimir Qazzayevin istefaya göndərilməsindən sonra sizlə də yollar ayrıldı…

- Baş məşqçi ailə problemlərinə görə klubdan ayrılmalı oldu. O getdirsə, bizim qalmağımızın heç bir mənası yox idi. Buna görə də Qazzayevlə bərabər biz də komandadan ayrıldıq.

- Klub rəhbərliyi işinizə davam etməyinizi təklif etmədi?

- Təklif olunsa da, olunmasa da, bu haqda düşünmədim. Onlar da bilirdilər ki, biz orda qalan deyilik. Ona görə də rəhbərliyə dedik ki, baş məşqçi gedirsə, üçümüz də gedirik.

- “Turan”ın maliyyə durumunu hansı klubumuzla müqayisə edə bilərsiz?

- “Turan”ın maliyyə durumu çox yüksəkdi. Klubun ən azı “Neftçi”dəki qədər büdcəsi var. Belə deyim, “Qarabağ”ı çıxmaq şərti ilə premyer-liqadakı bütün klublarımızın maliyyə durumundan üstündü.

- Millimizin qapıçısı Emil Balayevin aqibəti necə olacaq?

- Emilin zədəsi var idi, sıraya yeni qayıdıb. Bildiyim qədər cəmi bir həftədi məşq edir. Sadəcə, zamana ehtiyacı var. Orda mövsüm hələ yeni başlayıb. Ümid edirəm ki, növbəti matçlarda Emili meydanda görə biləcəyik.

- Yeni təliflər var?

- Hazırda fikrim A kateqoriyasını oxumaqdı. Bütün fikrimi buna yönəltmişəm

- Son günlər adınız “Sumqayıt”la birgə hallanır. Yenidən akademiyaya qayıtmaq planda var? Və ya Baqanın köməkçisi kimi əsas komandada işləmək istəyirsiz?

- Hazırda bu məsələ gündəmdə deyil. Belə təklif də yoxdu. B kateqoriyasını oxuyarkən “Sumqayıt”da çalışdım. Bilirsiz ki, bu kateqoriyanı oxuyarkən mütləq komanda lazımdı. 4 ay U-16 komandası mənə tapşırıldı. Bu müddətdə də can-başla işlədim. Sağ olsunlar ki, dərhal baş məşqçi təyin etdilər. Həyat davam edir. Nəsə baş versə, dərhal xəbərdar olacaqsız. Nəyisə gizlətməyə ehtiyac yoxdu. Nə qədər gizlədəsən? Buna görə də həmişə düzgünlüyü və təmizliyi seçmişəm. Tanıyanlar da bilir ki, bu keyfiyyətlər mənim üçün hər şeydən üstündü.

- Bir neçə gün öncə sizi külli miqdarda borc alıb verməməklə ittiham etdilər. Yayılan xəbərlə bağlı nə deyə bilərsiz?

- Bu haqda danışmaq belə istəmirəm. Bunu qabartmağa da ehtiyac yoxdu. Hamısı şayiədi.

SƏNƏM FƏRHADOVA