Vaqif Cavadovun Qazaxıstandakı günləri başa çatdı.

Böyük ümidlərlə yola saldığımız həmyerlimiz gözləniləndən xeyli tez vətənə qayıtdı. Artıq işsiz mütəxəssislər sırasındadı. Onsuz da işsiz futbol məşqçilərimizin sırası xeyli genişdi. Təəssüf ki, təkcə nisbətən yaşlılar, veteran sayılanlar yox, gənclər də işsiz qalır. Azərbaycanın futbol ailəsi xeyli kiçikdi. Premyer-liqada cəmi 8 klub mübarizə aparır. Onların da ikisinin “sükanı arxasında” əcnəbilər dayanıb. Deməli, belə futbol mühitində yerli mütəxəssislərin özünə iş tapması xeyli çətindi. Sərhədlərimizdən kənarda da bizimkilərə ehtiyac duyulmur. Baxmayaraq ki, rus və türk dillərində sərbəst danışırlar, onlarla anlaşmaqda çətinlik çəkmirlər. Amma Qərbi Avropa ölkələrini bir tərəfə qoyuram, heç Rusiya ilə Türkiyədə də azərbaycanlılara ehtiyac yoxdu. Nə futbolçu, nə də məşqçi kimi.

Bu səbəbdən də Vaqif Cavadov Qazaxıstana yollananda, “Turan”ın məşqçilər korpusuna daxil ediləndə xeyli sevinmişdik. Hətta bu gedişlə bağlı yazı qələmə almış, Cavadovun vaxtilə “Atırau”da çalışan Ramiz Məmmədovun səhvlərini təkrarlamayacağına ümidimi ifadə etmişdim. Düzdü, gənc mütəxəssis heç bir səhvə yol vermədi. Di gəl ki, “Turan”ın nəticələri yaxşı olmadı. Belədə Vladimir Qazzayev də Çimkənd təmsilçisi ilə yollarını ayırdı. Bəli, bu ayrılığa səbəb kimi komandanın nəticələri yox, çalışdırıcının ailəsindəki problemlər göstərilir. Amma biz belə hallarla dəfələrlə rastlaşmışıq. Məgər bir neçə ay əvvəl Qazaxıstan klubunun təklifinə “hə” deyəndə Qazzayev evindən uzaqlaşacağını bilmirdi? Məşhur məşqçinin oğlu “Turan”da istədiyini tapa bilmədi. Vaqifin açıqlamalarından belə başa düşülür ki, çalışdırıcı istədiyi heyəti qura bilməyib. Onun bəyəndiyi futbolçuların viza problemi klubun məsuliyyətli şəxsləri tərəfindən həll olunmayıb. Belədə “Turan” çempionata Antalyada hazırlaşdığı heyətlə qatıla bilməyib. Bu səbəbdən də nəticələr gözləniləndən xeyli pis olub. Klubla məşqçi də belə razılığa gəlib ki, gənc Qazzayevin gələcək karyerasına “uğursuz məşqçi” damğası vurmamaq üçün yolların ailə problemlərinə görə ayrıldığını desinlər.

Rusiyalı mütəxəssisin Qazaxıstan klubundan ayrılmasının zərbəsi bizə dəydi. Belə ki, “Turan”a Qazzayevlə birlikdə yollanan Vaqif Cavadov onunla da getməyə qərar verib. Hər halda, futbolda yazılmamış, amma qəbul olunmuş qaydalardan biri də budu. Kluba kimlə gəlmisənsə, onunla da getməlisən. Ümid edək ki, Valeri Qazzayev nə vaxtsa özünə iş yeri tapanda Vaqifin bu addımını da dəyərləndirəcək, gənc azərbaycanlı mütəxəssisi də yenidən yanına çağıracaq. Ona qədər isə Cavadov Azərbaycanda başını girələmək üçün axtarışda olacaq. Daha pisi odu ki, “Turan”dakı həmyerlimiz təkcə Vaqif deyildi. Məhz onun vasitəçiliyi ilə qapıçı Emil Balayev “Qarabağ”dan ayrılıb, “Turan”a yollanmışdı. Özü də Qazaxıstan Balayev üçün yad məkan deyil. Həmyerlimiz bir müddət əvvəl Kostanay “Tobol”unun heyətində xeyli uğurlu çıxış etmiş, Qazaxıstan çempionatına möhürünü vurmağı bacarmışdı. Onun xeyli müddət davam edən “quru” seriyası qonşu ölkənin idman mətbuatının manşetlərini bəzəyirdi. Çox təəssüf ki, davamı gəlmədi. “Tobol”a erməni məşqçinin gəlişi ilə Emil Azərbaycana qayıtdı.

Hərdən düşünürəm ki, bizimkilərin ölkə xaricində bəxti gətirmir. Balayevin ən yaxşı vaxtlarında “Tobol” erməniylə anlaşdı. İndi də Vaqiflə Emil “Turan”da özünə yer etməyə çalışanda Valeri Qazzayev ordan ayrıldı. Tərs kimi Emil “Turan”ın düşərgəsində zədələnib, bir müddət məşqlərdən uzaq qaldı və meydana çıxmağa macal tapmadı. Belədə onun özünü göstərməyə, “çərçivə”də dayanmağa layiq olduğunu isbatlamağa da imkanı olmadı. Bundan sonra necə olacaq? “Turan”ı çalışdıracaq yeni mütəxəssis azərbaycanlı qapıçıya etimad göstərəcəkmi, yoxsa onu sıxışdırıb, komandadan uzaqlaşdırmağa çalışacaq? Belə sualların sayı çoxdu, amma biz onları cavablamağa çətinlik çəkirik. Dəqiq bildiyim odu ki, bundan sonra Azərbaycandan xaricə yollanan futbol mütəxəssislərimizə, futbolçularımıza bir qədər bəxt də arzulamalıyıq. Bəxtsiz olmur, alınmır!


AMAL