Fransa çempionatının lideri PSJ-nin dünənki məşqindən öncə maraqlı hadisə yaşanıb.

Belə ki, Leyvin Kurzava məşqə 15 dəqiqə gecikib. Təxminən yarım milyon dollar qiyməti olan ''Ferrari 488'' markalı maşını ilə bazanın qarşısına gələn təcrübəli futbolçunu içəri buraxmayıblar. Onun siqnalverməsindən sonra da heç kim darvazanı açmayıb. Məlum olub ki, PSJ bu həftə əzəli rəqibi ''Marsel'' ilə qarşılaşacağından baş məşqçi Maurisio Poçettino futbolçulardan məşqə gecikməməyi tələb edib. Argentinalı mütəxəssis bazanın işçilərindən isə tələb edib ki, məşqə gecikən futbolçu üçün qapı açılmasın! Kurzavanın görüntüləri qısa müddət ərzində sosial şəbəkələrdə yayılaraq böyük marağa səbəb olub. Hadisə yerində onu çəkməyə gələn fanatların sayının artdığını görən futbolçu daha sonra maşınını sürərək həmin yerdən uzaqlaşıb. Bəzi mənbələr onun evə yollandığını və məşqdəiştirak etmədiyini yazsa da, belə olmayıb. Kurzava bazaya arxa qapıdan daxil olub. O bir müddət sonra bazadakı trenajor zalındaçəkdirdiyi şəkili ''instaqram''da paylaşıb. Qeyd edək ki, PSJ-də 7-ci mövsümünü keçirən 29 yaşlı sol cinah müdafiəçisi əsas heyətdəki yerini çoxdan itirib. Təsadüfi deyil ki, Kurzava bu mövsüm cəmi 1 rəsmi oyunda - ötən ilin avqustun 8-də ''Lill''ə qarşı superkubok matçında 9 dəqiqə meydanda olub.