Güclü qar səbəbindən bazar günü yarımçıq qalan, 25 dəqiqəsi dünən oynanılan “Qəbələ” - Zirə” matçı ilə premyer-liqada 19-cu tura yekun vuruldu.

Geridə qalan oyun həftəsi turnir cədvəlində yerdəyişmə ilə yadda qaldı. Turun mərkəzi qarşılaşması, heç şübhəsiz, Böyük Qafqaz dağlarının ətəyində keçirilən oyun idi. Qəbələdə eyniadlı komanda “Zirə”ni qonaq edirdi. Yuxarıda qeyd etdiyimiz kimi, bazar günü başa çatmalı olan görüş hava şəraiti səbəbindən iki gün oynanıldı və qolsuz yekunlaşdı. Bu heç-heçə, təbii ki, meydan sahiblərindən çox qonaqların işinə yaradı. Bakıətrafı qəsəbə təmsilçisi 18-ci turda yüksəldiyi ikinci pilləni qorumağı bacardı. “Qırmızı-qaralar” isə 3-cü yeri “Neftçi”yə təhvil verdi.

Ölkənin ən köklü klubu “doğma divarlar” arasında “Sumqayıt”ı qonaq etdi. O “Sumqayıt”ı ki, son illərdə daim “ağ-qaralar”a başağrı olub. Elə cari mövsümdəki ilk iki oyun da heç-heçə bitmişdi. Bu dəfə də “kimyaçılar” kiçik sürprizə imza atmağa yaxın idi. Ancaq son çempion 82-ci dəqiqədə istəyinə çataraq qələbə topunu vura bildi. Yaxşı ki, “ağ-qaralar”ın Emin Mahmudov və Eddi İsrafilov kimi futbolçuları var. Məhz bu duet oyunun taleyini həll etdi desək, yanılmarıq. Mahmudov dublla yadda qaldısa, İsrafilov meydanın mərkəzinin əsl ağası, komandasının “dirijoru” idi. Futbolun sirlərinə İspaniyada yiyələnən “14 nömrə”nin bütün ötürmələri, demək olar ki, ünvana çatırdı. Onun Mahmudovun fərqləndiyi epizoddakı ötürməsi də mükəmməl idi.

“Keşlə”nin “Səbail”i yenməsini də xüsusi vurğulamaq lazımdı. Ötən turun şərhində qeyd etiyimiz kimi, Sənan Qurbanovun komandasında oyun planında irəliləyiş hiss olunur. “Qarabağ”la heç-heçə edən, “Sabah”dan əsas vaxtın son dəqiqəsində qol buraxan komanda, nəhayət, bu tur istəyinə çataraq hesabına 3 xal yazdı. Qələbə sayəsində bakılılar turnir cədvəlində mövqeyini dəyişməsə də, ən yaxın izləyicisi “Sumqayıt”dan 5 xal aralandı.

Murad Musayevin gəlişindən sonra yüksəliş qrafiki cızan “Sabah” son turlarda uğursuzluğa düçar olub ki, “Qarabağ”la matçdan sonra keçirilən mətbuat konfransında “tələbələr”in baş məşqçisi də qış fasiləsindən sonra eniş yaşadıqlarını etiraf etdi. Ağdamlılara minimal hesabla yenilən komandanın avrokuboklara vəsiqə qazanması NATO-nun Rusiya ilə müharibə etməsi qədər absurd görünür. Masazır dueli parlaq alınmasa da, “Qarabağ” istəyinə çataraq 13-cü qələbəni bayram etdi ki, bu da çempionluq yolunda daha bir səddi aşmaq demək idi.

Azərbaycan premyer-liqası
19-cu tur, 3-cü dövrə
12 mart
Səbail - Keşlə 0:3
Sabah - Qarabağ 0:1
13 mart
Neftçi - Sumqayıt 2:1
13/14 mart

Qəbələ - Zirə 0:0
1.Qarabağ 18 13 4 1 38-10 43
2. Zirə 19 10 5 4 27-16 35
3. Neftçi 19 10 4 5 30-23 34
4. Qəbələ 19 9 6 4 30-22 33
5. Sabah 19 7 2 10 24-27 23
6. Keşlə 19 5 3 11 21-29 18
7. Sumqayıt 18 3 4 11 11-28 13
8. Səbail 19 3 2 14 12-38 11

Bombardirlər: Davit Volkov (Zirə) – 10, Filip Ozobiç, Abdulla Zubir (hər ikisi "Qarabağ") – 8.
Növbəti turun oyunları: 18 mart – Keşlə - Sumqayıt, Neftçi – Qəbələ; 19 mart - Sabah – Səbail, Zirə - Qarabağ.
RƏŞAD