Nurlan Novruzov Nepalda mövsümün oyunçusu seçilib.

Onun çıxış etdiyi “Maçindira” ölkə çempionu olubsa, özü 16 oyunda 6 qol və 6 məhsuldar ötürmə ilə yadda qalıb. Həmyerlimiz komandasının çempionluğunu rəsmiləşdirən qolun da müəllifidi. Bu məqamları nəzərə alıb, Nurlanla həmsöhbət olduq.

- Mövsümün futbolçusu seçilmisən, həm də ölkə çempionu olmusuz. Bu barədə nə demək istəyirsən?

- Fərdi uğurlara çox da önəm verən biri deyiləm. Önəmli olan komandanın çempionluğudu. Bunun üçün hər kəs meydanda bir olmalıdı. Futbol komanda oyunu oynamadan qazana bilməyəcəyimiz bir idman növüdü. İlk növbədə komanda oyunu sərgiləmək şərtdi. Çempionluq asan qazanılmadı. İkinci yerlə xal fərqi 10-un üzərində olsa da, ağır oyunlarımız çox oldu. Bunu bacardığımız üçün çox xoşbəxtəm.

- Bundan sonra karyeranda nə kimi dəyişiklik olacaq? Başqa klubda və ya ölkədə oynamaq fikrin var?

- Nepalda çempionat 3 ay sonra başlayacaq. Bu üzdən Bakıya qayıdacam. Asiya ölkələrindən təkliflər var. Real təklif olarsa, yəqin ki, istirahətdən sonra həmin ölkəyə səfər edəcəm.

- Asiya Çempionlar Liqasında Şri Lanka komandasına uduzduz. Məğlubiyyətin səbəbi nə idi?

- Həqiqətən rəqibdən üstün oynadıq. Şanslarımız çox olsa da, dəyərləndirə bilmədik. Rəqib müdafiə futbolu oynayaraq, əks-hücumlara üstünlük verirdi. Yaratdıqları vəziyyətləri qola çevirdilər. Məğlub olmuşuqsa, deməli, rəqib daha çox istəyib və qələbə qazanıb. Şri Lanka komandasına bundan sonra uğurlar arzulayıram.

- Azərbaycan klublarından təklif gəlib? Yenidən ölkəmizdə oynamaq istəyərsən?

- Xeyr, hələ ki Azerbaycandan təklif almamışam. Oynamaq məsələsinə gəlincə, xeyirlisi deyək.

- Millimizin uğursuzluğu göz önündədi. Problem məşqçidə, yoxsa futbolçulardadı?

- Neçə ildi milliylə bağlı açıqlamalar verilir, amma təəssüf ki, ciddiyə alınmır. Təbii ki, bu futbolçularda da problem var. Amma əsas fiqur baş məşqçidi. Çalışdırıcı zamanla istədiyi taktikanı komandaya yeritməlidi. Əcnəbi məşqçi gətirirlər, o da özümüzdən reytinqdə aşağı, zəif milliyə qarşı müdafiə futbolu oynadır. Belə yerdə hansı inkişafdan söz gedir? Bizim milliyə ya yerli, ya da türkiyəli məşqçi lazımdı. Ancaq qanımızı, ruhumuzu anlayan biri bizə uğur qazandıra bilər.

- De Byazi futbolçularda xarakter olmadığını, buna görə də onlara təsir edə bilmədiyini dedi. Düzdü, sonra bunu təkzib etdi. Bu haqda nə deyə bilərsən? Millinin futbolçuları buna reaksiya bildirməliydi?

- Xarakterlə bağlı mənfi bir şey düşünürsə, əvvəlki oyunlarımıza baxsın. Futbolçularımız yetərincə xarakter göstərib, göstərə də bilirlər. Burda, sadəcə, məşqçi işi önəmlidi. Məncə, bu fikirlə De Byazi futbolçuları, rəhbərliyi, eləcə də xalqımızı məyus etdi. Sən bu ölkənin çörəyini yeyirsən, burda yaşayırsan. Ən azı hörmət etməlisən. Azərbaycan futbolçularına xaraktersiz deyə bilməzsən.

GÜNAY VƏLİYEVA