Bundesliqada matçın gedişində oruc fasiləsi verildi!
Bundesliqada çərşənbə günü oynanılan 26-cı turdan təxirə salınmış ''Auqsburq'' - ''Maynts-05'' matçında diqqətçəkən bir hadisə yaşandı.
Oyunun 65-ci dəqiqəsində ilk baxışdan kiçik bir su fasiləsi verildi. Top meydanı tərk etdikdən sonra hakim Matias Yöllenbek oyunu saxlayaraq ''Maynts-05''in üzvü Mussa Niakatenin su içməyinə şərait yaratdı. Sonradan məlum oldu ki, sən demə 26 yaşlı fransalı müdafiəçi orucunu açırmış. Niakate daha sonra hakimə təşəkkürünü bildirdi və oyun davam etdirildi. Almaniya mətbuatı bu hadisəyə geniş yer ayırdı. Çünki bundesliqa tarixində ilk dəfə Ramazan ayında bir matçın gedişində su fasiləsi verildi. Tarixi hadisənin iştirakçısı olan Niakate yerli vaxta görə matçın 62-ci dəqiqəsindən sonra orucunu aça biləcəyinin fərqində olduğunu deyərək bunları dedi:
''Fasilədə hakimdən soruşdum ki, fürsət yaransa, 62-ci dəqiqədən sonra oyunu bir neçə saniyəlik dayandırmaq mümkündümü? Bunu etmək məcburiyyətində deyildi. ''Xeyr'' deyə bilərdi və mən də bunu anlayışla qarşılayardım''.
Hakim Yöllenbek isə bunları dedi:
''Niakate məndən 60-70-ci dəqiqələr aralığında su içmək üçün oyunu dayandırmağın mümkün olub-olmadığını soruşdu. Bir qədər qəribə idi. Çünki daha öncə belə bir müraciətlə qarşılaşmamışdım. Təbii ki, razılaşdım. Həmin anlarda oyun dayanan kimi Niakateyə xəbər verdim və su içənə qədər oyunu saxlatdırdım''.
Digər xəbərlər
