Gəncəli rəis AFFA-nı nişan verdi - AÇIQLAMA
Bir müddət əvvəl AFFA-nın vəsaiti hesabına Yeni Gəncə yaşayış massivində yerləşən süni örtüklü meydançada əsaslı təmir və yenidənqurma işləri aparıldı.
Bu "Kostya dayının meydançası" kimi tanınan ərazi idi. Ötən sayımızda həmin meydançada paltardəyişmə otağının olmaması barədə məlumat vermişdik. Məsələ ilə bağlı AFFA-nın və orda məşq keçən mütəxəssislərdən açılama alsaq da, yerli İcra Hakimiyyətinin mövqeyini öyrənə bilməmişdik. Əldə etdiyimiz məlumata görə, paltardəyişmə otağını tikməyi İcra Hakimiyyəti öhdəsinə götürsə də, bu işi həyata keçirməyib.
Dünən bununla bağlı Gəncə şəhər Gənclər və İdman Baş İdarəsinin rəisi Həmid Nəsirovla danışdıq:
“İlk dəfə Elxan Məmmədov Gəncə şəhərinə gələndə bizim başçı Niyazi Bayramovun şəxsi təşəbbüsü ilə Yeni Gəncə yaşayış massivində və “Lokomotiv” stadionunda belə bir addım atıldı. AFFA orda iki meydança qurmağa başladı. Martda hər iki meydançanın açılışı oldu. Əslində AFFA söz vermişdi ki, orda paltardəyişmə otağı tikəcək. Düzdü, sənəd üzərində olmadı. Sadəcə, şifahi şəkildə deyildi ki, çalışıb tikəcəyik. Sonra açılışda - futbol veteranları da orda idi - sual verildi ki, paltardəyişmə otağı necə olacaq? AFFA-dan deyildi ki, bu məsələ bizlik deyil. İcra Hakimiyyəti “paltardəyişmə otağını biz tikəcəyik” deməyib. Bildirilib ki, hansısa sahibkardan xahiş edib kömək istəyərik. Yəni İcra Hakimiyyəti bunu üzərinə götürmədi. Bu, yanlış məlumatdı. Biz dəfələrlə futbol veteranları ilə görüşmüşük, amma heç vaxt bu barədə nəsə edəcəyimizi deməmişik. Bir sözlə, İcra Hakimiyyəti bu məsələdə söz verməyib. Biz bunu AFFA-dan gözləyirdik. Onu da qeyd edim ki, AFFA meydança qurub, yeni örtük salıb, amma heç vaxt yanında nəsə tikməyib. Bəlkə də AFFA xətirlərinə dəyməsin deyə elə deyib, amma sonra yerinə yetirmək alınmayıb”.
Qurumun rəhbərindən bundan sonra paltardəyişmə otağı ilə bağlı işlərin görülüb-görülməyəcəyini də soruşduq:
“Bu elə bir məsələdi ki, səlahiyyətlər var. Həm də imkanlar daxilində olan bir işdi. Hər dəfə görüşlərdə deyirəm ki, idmanı sevən iki-üç yardımsevər sahibkar birləşsin, onların vasitəsilə nələrsə edək. Ora bələdiyyənin balansındadı. Onu da tikmək üçün vəsait lazımdı. Başqa kimsə tiksə, deyəcək ki, gəlir, yəni kommersiya məqsədli olsun. Ona görə qəliz məsələdi. Bu üzdən belə məsələlərdə idmansevər sahibkarlar axtarırıq ki, onların hesabına tikdirək. Gəncədə belə meydançalar çoxdu, əksəriyyətində də paltardəyişmə otağı yoxdu. Birində tikilsə, o birilər də tələb edəcək ki, bizdə də olsun. Bu artıq proqram şəkildə olmalıdı. Yalnız “Kostya dayının meydançası” ilə yara sağalmır. Burda tikilsə, hamsının haqqı var desin ki, bizdə də tikin. Əsas odu ki, futbol meydançası var, uşaqlar oynaya bilir, məşqlər keçir. Bunun özü də çox böyük işdi”.
GÜNAY VƏLİYEVA
