Bir müddət əvvəl AFFA-nın vəsaiti hesabına Yeni Gəncə yaşayış massivində yerləşən süni örtüklü meydançada əsaslı təmir və yenidənqurma işləri aparılmışdı.

Bu "Kostya dayının meydançası" kimi tanınan ərazi idi. Sakinlərin istifadəsinə verilən meydançanın açılış mərasimində AFFA-nın icraçı vitse-prezidenti Elxan Məmmədov, Gəncə Şəhər İcra Hakimiyyətinin başçısı Niyazi Bayramov, Regional Futbol Federasiyaları İctimai Birliyinin prezidenti İsgəndər Cavadov və futbol ictimaiyyətinin nümayəndələri iştirak etmişdi. Elxan Məmmədov meydançanın rəmzi açarını Niyazi Bayramova təqdim etmiş, daha sonra uşaqların iştirakı ilə oyun keçirilmişdi.
Konstantin Abromenkonun adını daşıyan meydançada "Kəpəz" veteranlarına məşq keçmək üçün şərait yaradılıb. Artıq seleksiya işləri də başlayıb. Amma ərazidə paltardəyişmə otağı istifadəyə verilməyib. Görəsən, bu məqam problemlər yaratmır? Ümumiyyətlə, paltardəyişmə otağının təmiri niyə ləngiyir? Suallarımızı "Kəpəz"in veteranı, hazırda orda uşaqları məşq etdirən Fazil Parvarova ünvanladıq:

[quote]"Hazırda AFFA bizə böyük dəstək verir. "Kəpəz" veteranları olaraq qurumun vitse-prezidenti Elxan Məmmədova təşəkkür edirik ki, bizə bu şəraiti yaratdı. Hələ orda sənədləşmə prosesi gedir. Paltardəyişmə otağına gəlincə, narahatlığa səbəb yoxdu. O da tikiləcək. Bu mövzuda valideynlərin narahatlığına heç bir səbəb yoxdu. Hər şey vaxtı çatanda düzələcək. Hazırda qruplar üzrə uşaq seçimləri davam edir. Hər şey yoluna düşəcək. Səbr etmək lazımdı".[/quote]


Fazil bəy sözlərinə bunları da əlavə etdi:

[/b][/quote]"Bizdə elədi ki, işləyənlər də maaş alanda narazılıq edir. Amma ömrünü futbola həsr edənlər narazılıq etmirlər. Biz də işlə təmin olunarıq".[/b][/quote]

Görəsən, süni örtüklü meydançanın planında paltardəyişmə otağı olub? AFFA-nın Mətbuat və İctimaiyyətlə Əlaqələr Departamenin rəhbəri Firuz Abdullanı dinləyək:

[quote]"Həmin ərazidə vaxtilə Konstantin Abramenko tələbələrinə futbolun sirlərini öyrədib. O meydança da baxımsız vəziyyətdə idi. AFFA orda süni örtüklü meydança inşa etdi. Süni örtüklü meydançaların bəlli standartları var. Bu, AFFA tərəfindən uzun illərdi həyata keçirilən layihədi. İndiyə qədər müxtəlif bölgələrdə, eləcə də Bakıda onlarla belə meydança inşa olunub və təmənnasız həmin ərazidə yaşayan sakinlərin ixtiyarına verilib. Ümumiyyətlə, suni örtüklü meydançaların salınması ilə bağlı qaydalar bundan ibarətdi ki, yerli icra orqanları və ya məktəbin ərazisindədisə, orda yer ayrılır, süni örtüyün döşənəcəyi ərazi asfaltla örtülür və ətrafı dəmir torla hasarlanır. Amma orda paltardəyişmə otağının inşası əvvəldən AFFA tərəfindən nəzərdə tutulmayıb".[/quote]

Etibarlı mənbədən aldığımız məlumata görə, paltardəyişmə otağının tikilməsini yerli İcra Hakimiyyəti öhdəsinə götürüb. Lakin buna əməl etməyiblər. Bununla bağlı adı çəkilən qurumun mövqeyini öyrənmək istəsək də, cəhdlərimiz nəticəsiz qaldı. Məsələni gündəmdə saxlayacağıq.

GÜNAY VƏLİYEVA