"Orxanın klubdan ayrılmasına səbəb müqavilə müddətinin başa çatması və Moldova təmsilçisinin öhdəliklərini yerinə yetirməməsi olub. Belə ki, Orxan 2021-in martında icarə əsasında keçib və ilin sonuna qədər komandanın uğurları üçün çalışıb. Dekabrın 31-də müqavilə müddətinin başa çatmasına baxmayaraq, Moldova təmsilçisi öhdəliklərini tam və lazımi şəkildə yerinə yetirməyib. Klub Orxana ödəməli olduğu 10 aylıq əməkhaqqının yalnız ilk 3 ayının ödənişini həyata keçirmidi. Qalan 7 ayın ödənişinin icrasından boyun qaçırmışdı. Öz vəsaiti hesabına Azərbaycana qayıdan futbolçu bununla bağlı hüquqi tədbirlərə əl atmadan öncə "Dinamo-Avto" rəsmiləriylə dəfələrlə əlaqə saxlayıb, lakin müsbət nəticə əldə etməyib. Oyunçu sözügedən məsələ ilə bağlı peşəkar hüquq xidmətindən yararlanaraq FIFA-ya rəsmi müraciət ünvanlayıb. Uzun sürən prosedurlardan sonra qurum iddianı tam təmin edib və nəticədə klub futbolçuya borcunu tam ödəyib".

"Dinamo Avto" ilə problemim yalnız əməkhaqqı ilə bağlı idi. Maaşı almaqda çətinlik yaranmışdı. Başqa heç bir problemlə üzləşməmişdim. Şərait və baza baxımından hər şey qaydasında idi. Komandada münasibət də normal idi. Ölkə xaricində oynamağım ilk deyil. Ona görə də tez uyğunlaşa bildim. Klubda əsas sıxıntı maliyyə məsələsində idi. O da söz verirdilər ki, 10-15 günə, 1 aya olacaq. Beləcə məsələ uzanırdı. Bir müddət sonra qərara gəldim ki, ili başa vurub müqaviləmin sonuna qədər oynayım. Daha sonra rəsmi şikayətimi bildirərəm. Özlərinə də öncədən xəbərdarlıq etmişdim ki, belə hal baş versə, FİFA-ya müraciət edəcəm. Açığı, onlar buna çox da inanmadılar. Dedilər, göndərəcəyik, tələsmə. Bakıya qayıdandan sonra gördüm ki, xəbər yoxdu. Mən də aidiyyatı quruma müraciət etdim”.

“Ölkə xaricindən bəzi təkliflər var. Sadəcə, maaş baxımından qane etmədi. Həm də marağıma uyğun deyildi. Yaş baxımından da çox gənc deyiləm ki, məbləği düşünmədən hansısa ölkəyə gedim. İndi elə bir yaşdayam ki, maaş böyük önəm daşıyır. Azərbaycan premyer-liqasında mübarizə aparan klubdan da təklif var idi. Az maaş təklif etdiklərinə görə alınmadı”.

“Azərbaycan çempionatını daha üstün tuturam. Düzdü, Moldovada iki-üç klub normal çıxış edir. Bildiyiniz kimi, “Şerif” bu il ÇL-də mübarizə aparıb. Digər komandalardan çox üstündülər. Amma 2-3 klub da var ki, Moldova millisinin futbolçuları orda oynayır. Büdcə baxımından da Azərbaycan daha üstündü. Hər klubda baxımlı oyun göstərən legionerlər çıxış edir. Ancaq Moldovada büdcə aşağı olduğundan "Şerif"dən başqa heç birinin belə imkanı yoxdu. Əlbəttə, Azərbaycan daha üstündü. Açığı, son hadisələrdən sonra karyeramı davam etdirib-etdirməməklə bağlı çox düşünürəm. Çünki orda pis çıxış etmədiyimi fikirləşirəm. Bir il ərzində 28 oyuna çıxdım. Ancaq təəssüf ki, Azərbaycanda istədiyim marağı görə bilmədim. Bu da mənə psixoloji təsir etdi. Ona görə də futbol oynamaq haqda hələ düşünmürəm".