FIFA Orxan Qurbanlının Moldovanın "Dinamo-Avto" klubuna qarşı şikayətini təmin edib.

Bunu redaksiyamıza açıqlamasında futbolçunun hüquqlarını müdafiə edən hüquqşünas Vüsal Seyfullayev bildirib:

"Orxanın klubdan ayrılmasına səbəb müqavilə müddətinin başa çatması və Moldova təmsilçisinin müqavilə üzrə öhdəliklərini icra etməməsi olub. Belə ki, Orxan 2021-ci ilin mart ayında "Dinamo"ya icarə əsasında keçib və həmin ilin sonunadək klubun uğurları üçün çalışıb. 2021-ci il dekabr 31-də müqavilə müddətinin başa çatmasına baxmayaraq Moldova təmsilçisi öz öhdəliklərini tam və lazımi şəkildə icra etməyib. Klub Orxana ödəməli olduğu 10 aylıq əmək haqqının yalnız ilk 3 ayının ödənişini həyata keçirmidi. Qalan 7 ayın ödənişinin icrasından boyun qaçırmışdı. Öz vəsaiti hesabına Azərbaycana qayıdan futbolçu bununla bağlı hüquqi tədbirlərə əl atmadan öncə "Dinamo" rəsmilərilə dəfələrlə əlaqə saxlayıb, lakin heç bir müsbət nəticə əldə etməyib. Oyunçu sözügedən məsələ ilə bağlı peşəkar hüquq xidmətindən yararlanaraq FIFA-ya rəsmi şəkildə müraciət ünvanlayıb. Uzun sürən prosedurlardan sonra qurum iddianı tam təmin etmiş və nəticədə klub futbolçuya olan borcunu tam ödəyib".

Qeyd edək ki, Orxan Qurbanlı daha əvvəl "Neftçi", "Dauqavpils" (Latviya), "Səbail" və "Ventspils" (Latviya) futbol klublarının şərəfini qoruyub. O, "Dinamo"da 2021-ci ilin mart ayından çıxış edirdi. Moldova təmsilçisinin heyətində 25 çempionat, 2 kubok oynunda iştirak edib.

SƏNƏM FƏRHADOVA