Tədricən ''Barselona''nın aparıcı oyunçularından birinə çevrilməkdə olan Pedri İspaniya mətbuatına açıqlamalar verib.

''Real'' üzərində qələbədən, ''Qalatasaray''a vurduğu qoldan və digər məqamlardan danışan 19 yaşlı futbolçu bir neçə il əvvəl ''Real''ın ondan üz döndərdiyini etiraf edib:

''Real''ın əsas komandası ilə cəmi 3 gün məşqə çıxdım və məni bəyənməyib B komandasına göndərdilər. Sonra bu səviyyə üçün yetərli olmadığımı deyib ümumiyyətlə komandadan kənarlaşdırdılar. Rədd olunmaq təbii ki, xoş bir şey deyil. Amma sonradan bu, mənim üçün motivasiya qaynağına çevrildi. Bu cür düşünüb çalışmağa davam etdim və indi də həmişə arzusunda olduğum bir klubdayam. ''El Klasiko''dan sonra qələbə sevincini həddən artıq şişirtdiyimizi iddia edənlər var. Həssaslığı anlayıram. Amma əminəm ki, ''Real'' da bizi bu cür yensəydi, eyni şəkildə sevinərdi. Belə qələbədən sonra soyuqqanlı qalmaq çətindi. ''Qalatasaray''a qarşı səfər matçındakı atmosfer məni yaxşı mənada təəccübləndirdi. Daha öncə heç vaxt bu cür ab-havada oynamamışdım. Açığı, bir müddət sonra fanatların yorulacağını və uğultunun kəsiləcəyini düşünürdük. Amma əksinə hər ötən dəqiqə daha da çox bağırıb qulağımızı batırırdılar. Vurduğum qol çox müzakirə olundu. ''TikTok''da bu qolla bağlı videolar gördüm. Topu qəbul edən kimi Markaonun üstümə gəldiyini gördüm. Topa zərbə vuracaqmış kimi göstərib onu geridə qoydum. Sonra mənə doğru daha bir ayağın uzandığını görüb eyni hərəkətlə bir az da irəlilədim. Qarşımda bir futbolçu da peyda olsaydı, çox güman artıq meydanın kənarına çıxmalı olacaqdım. Zarafat bir qırağa, bunun indiyə qədər karyeramda vurduğum ən gözəl qol olduğunu düşünürəm''.