Cəlal Qurbanov: “Bu uğurun davamı gələcək” - Azərbaycanlı boksçu
“Avropa çempionatında komandamızın heyətində ilk olaraq rinqə mən çıxdım. 1/16 finalda finlandiyalı rəqibimə 5:0 hesabı ilə qalib gəldim”.
Bunu Azərbaycan Boks Federasiyasının rəsmi saytına Xorvatiyanın Poreç şəhərində keçirilən 22 yaşadək boksçular arasında bürünc medal qazanan Cəlal Qurbanov (63,5 kq) deyib.
Gənc idmançı qitə birinciliyində qazandığı mükafatın gələcək karyerasında böyük əhəmiyyət kəsb edəcəyini bildirib:
“1/8 finalda sloveniyalı boksçuya da 5:0 hesabı ilə qalib gəldim. Ardınca ukraynalı rəqibi də mübarizədən kənarlaşdırmaqla, yarımfinala yüksəldim və medalı təmin etdim. Lakin bəzi səbəblərdən çempion ola bilmədim. Bu, hələ başlanğıcdı. U-22-lərin yarışında daha 2 ilim var. Həmin illərdə hədəfim yalnız qızıl medal olacaq. Təcrübə baxımından isə bu yarışın mənə faydası böyük oldu. 4 görüş keçirdim. İnanıram ki, növbəti yarışlarda daha yüksək əyarlı mükafatlar qazanacam. İlk medalımdı və bu mənə böyük motivasiya verdi. Bu uğurun davamı gələcək”.
Qeyd edək ki, Azərbaycan millisi Avropa çempionatını 4 medalla başa vurub.
Digər xəbərlər
