Atadan oğula ötürülən “Neftçi” sevgisi
Çingiz Əhmədov Azərbaycanın tanınmış komediya aktyoru, Əməkdar artisti, Dövlət Musiqili Teatrının əməkdaşıdı.
Onun yer aldığı filmlər, tamaşalar hamıya bəllidi. Çingiz bəylə futbol matçlarında da rastlaşmaq mümkündü. Bəli, o Azərbaycan futbolu ilə yaxından maraqlanan fanatlardandı. 59 yaşlı aktyor çılğın “Neftçi” azarkeşidi. Hər dəfə “ağ-qaralar”ın istər çempionat, istər avrokubok, istərsə də kubok matçlarında tribunadakı yerini alır. “Neftçi”nin 85 illik yubileyində Əhmədova tribuna verməyi qərara aldıq: “Neftçi”yə böyük hörmətim var. Asim Xuiyev, Maşallah Əhmədov, İsgəndər Cavadov dostumdu. Şükür Allaha, onlarla hələ də əlaqəmiz davam edir. Bu gün komandamızın 85 illiyidi. Onlara uğurlar arzulayıram. Biz “Neftçi” ilə böyümüşük. Həmişə komandamın uğurlarına sevinmişəm və sevinəcəm də. Burda peşəkar şəxslər futbol oynayıb. İqor Ponomaryovla qonşu olmuşam. Onunla bir yerdə böyümüşük. Daha sonra “Neftçi”nin əfsanələrindən biri oldu. Samir Abasov var olsun ki, komandamızın yükünü çiyinlərində daşıyır. Belə bir yerdə işləmək hər oğulun işi deyil. O gün olsun ki, “Neftçi”nin 100 illiyində yenə mənimlə əlaqə saxlayıb, təəssüratımı öyrənəsiz. Onlara, sadəcə, uğurlar arzulayıram. Nə qədər qələbə qazansalar, bizim sevincimizə səbəb olacaq. Ağ-qara rənglər mənim üçün çox önəmlidi. “Neftçi”nin qələbəsinə öz uğurum kimi sevinirəm. Bu komanda ilə ilk tanışlığım 1987-ci ildə olub. 16 yaşım var idi. Rəhmətlik atam məni özü ilə futbola apardı. Uşaqlıqdan futbola bağlı olmuşam. Ponomaryovla birgə oynayırdıq. Məktəbimizin arxasında balaca stadion var idi. Orda qırğın oyunlar olurdu. Yadıma gəlir vki, həmin il “Neftçi” tumları qırılmış ermənilərin “Ararat” klubu ilə qarşılaşırdı. Həmin oyunda 2:0 hesabıyla qalib gəldik. Həmin gün sevincimin həddi-hüdudu yox idi. Namazov, Şıxlarov, Xudiyev komandanın əsas üzvlərindən idi. Onları izləyə-izləyə “Neftçi”yə bağlanmışam. Komandamıza bir daha uğurlar arzulayıram. Bütün qələbələr bizim olsun”.
Çingiz Əhmədov etimad göstərəcəkləri halda “Neftçi”nin Müşahidə Şurasında təmsil olunmaq istədiyini söylədi: “Bəhram Bağırzadə də klubda təmsil olunub. “Neftçi rəhbərliyi məsləhət görsə, böyük məmnuniyyətlə onların yanında ola bilərəm. Mən buna həmişə hazıram. Çünki “Neffçi” ilk komandamız olub. Onlarla fəxr etmişik, oyunlarından ləzzət almışıq. Həmişə “Neftçi”nin yanındayam”.
Belə bir deyim var: “oğul atasından gördüyünü öyrənər, onun sevdiyi işlərlə məşğul olmaq istəyər”. Çingiz bəyin oğlu İbrahim də atasının yolunu davam etdirir. O, həm aktyorluq fəalliyyəti ilə məşğuldu, həm də çılğın “Neftçi” azarkeşidi. Təbii ki, bu önəmli gündə İbrahimin fikirlərinə də yer vermək pis olmazdı. Gənc aktyor komandaya məhəbbətini belə ifadə etdi: “Neftçi” sevgisi mənim üçün tam başqadı. Həmişə komandamızın oyunlarına gedir, flaqmana dəstək oluruq. Atamla mən avrokubok azarkeşi deyilik. Orda qazanılan uğurlara görə “Neftçi”ni sevməmişik. Biz komandaya tarixinə görə bağlıyıq. Buna görə Azərbaycan premyer-liqasının oyunlarına gedirik, dəstək oluruq, bundan sonra da olacağıq. Evimizdə Rail Məlikovun “Neftçi”də çıxış edərkən geydiyi forma var. Komanda İntertoto kubokunda “Jerminal”la oynayırdı. Həmin matçdan sonra Rail formasını mənə hədiyyə etdi. Sevincli günüm idi. Biz ailəlikcə “Neftçi”yə bağlıyıq. Əminəm ki, atam klubun Müşahidə Şurasında yer alsa, əlindən gələnin ən yaxşısını etməyə çalışacaq. Çünki onun qəlbində bu kluba sevgi var. “Neftçi” adı böyük tarixdi. Pis vəziyyətdə olanda da biz onu sevirik”.
İLKİN SULTANLI
Digər xəbərlər
