“Səbail” premyer-liqada zəif çıxış etsə də, azarkeşləri çempionata kifayət qədər maraq qatır.

Söhbət həm “dənizçilər”dən, həm də “49”dan gedir. Təbii ki, birincilər klubun rəsmi fanklubudu. “49” isə azaddı. Onların özlərinə məxsus ideologiyaları var. Bu gün adı çəkilən azarkeş qrupu barədə bəzi məlumatları diqqətinizə çatdıracağıq. Əvvəlcə başlayaq addan. Nəyə görə “49”? Fanklub rəhbərliyinə dəfələrlə müraciət etsək də, adlarının mənasını açıqlamayıb. Amma “Futbol+” qəzeti olaraq azarkeş qrupunun sirrini əldə etmişik. “49” adı Azərbaycan Respublikasının Konstitusiyasının 49-cu maddəsinə əsasən qoyulub. Gəlin, görək həmin maddə nə deyir: “sərbəst toplaşmaq azadlığı”. Adı çəkilən fanklubda yer alan şəxslərin əksəriyyəti siyasi fəallardı. Bu səbəbdən də futbol tribunalarını sərbəst toplaşa biləcəkləri yer olaraq görürlər.

Bu məsələ aydınlaşdısa, keçək başqa mövzuya. Deyilənlərə görə, bu fanklub “Səbail” rayonundan deputatlığa namizəd olan siyasi fəal Bəxtiyar Hacıyevin layihəsidi. Görəsən, həqiqətdi? Məsələni dəqiqləşdirmək, suallara aydınlıq gətirmək üçün Bəxtiyar bəylə əlaqə saxladıq.

- Azərbaycan premyer-liqasında çıxış edən “Səbail”in oyunlarında 2 dəfə sizi tribunada görmüşük. Ölkə futbolu ilə yaxından maraqlanırsız?

- “Səbail”in azarkeş qrupu olan “49” dediyiniz matçlara məni dəvət ediblər. Onlar Səbail rayonundan seçilən deputat olaraq məni qəbul edirlər. Bu səbəbdən də məni komandalarına dəstək olmaq üçün dəvət ediblər. Həm gənclərə, həm də Azərbaycan futboluna dəstək olmaqdan başqa niyyətim olmayıb.

- İctimaiyyət arasında belə məlumat yayılıb ki, adı çəkilən azarkeş qrupunun yaradıcısı sizsiz. Bu, nə qədər doğrudu?

- Səhv məlumatdı. Həmin azad azarkeş qrupunun həm yaradıcıları, həm də üzvləri başqalarıdı. Mən, sadəcə, virtual üzvəm. Vaxtım və imkanım olanda oyunlara gedib, həm gənclərə, həm də kluba dəstək oluram. Yenə deyirəm, komandanın adı sırf “Səbail” olduğuna görə məni dəvət ediblər. Onların xahişini yerə salmayıb, oyunlara getmişəm. Nə yaradıcısıyam, nə də idarə heyətinin üzvü. Onların həyata keçirdikləri kreativ proseslərə də təsirim yoxdu.

- İctimai fəal olaraq ölkədə baş verən proseslərlə bağlı iddialı açıqlamalarınızı, müsahibələrinizi oxumuşuq. Amma Azərbaycan futbolunda olan problemlər və ya başverənlərlə bağlı nəsə deməmisiz. Bunun səbəbi nədi?

- “Qarabağ”ın oyunları ilə bağlı dəfələrlə postlar paylaşmışam. Amma ölkə futbolunda baş verən proseslərdən o qədər də anlayışım yoxdu. Bu səbəbdən də nəyisə təhlil edə bilmirəm. Məlumatı olan şəxsləri oxuyuram. Amma baş verən proseslərə fikir bildirəcək qədər məlumatım olmadığından ortaya mövqe qoymağı düzgün hesab etmirəm.

- Milli Məclisə deputat seçilsəz, futbolun inkişafı ilə bağlı hansı işləri görəcəksiz?

- Bu gün şərhlərini, təhlillərini oxuduğum insanlara bu istiqamətdə işləməsi üçün şərait yaradardım. Amma bunlar olmayacaq. Çünki mən bu Milli Məclisdə deputat olmaq istəmirəm.

İLKİN SULTANLI